Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 132 Hüküm no: 110 Orijinal metin no: [21b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Hüseyin’in üzerindeki mezraa ve çayırları Ayasofya Vakfı’na devrettiği Havâss-ı Kostantıniyye kazâsı muzâfâtından Sarac karyesinde sâkin olan Mehmed Bey b. Hüseyin el-Cündî meclis-i şer‘-i hatîr-i lâzımü’t-tevkīrde, mahmiye-i Kostantıniyye’de vâki‘ Ayasofya Vakfı’nın bi’l-fi‘il mütevellîsi olan bâ‘isü’l-kitâb umdetü’l-emâcid ve’l-a‘yân İsmail Efendi b. Bâli nâm kimesne tarafından ikrâr-ı âti’z-zikri tasdîka vekîl olup, vekâleti nehc-i şer‘î üzre sâbite olan el-Hâc İbrahim b. el-Hâc Abdi nâm kimesne mahzarında bi tav‘ihî ikrâr ve takrîr-i kelâm edip, mahmiye-i merkūmede âsûde olan merhûm-ı mağfiret-nişân Şehzâde Sultan Mehmed Hân Vakfı’ndan havâss-ı merkūme tevâbi‘inden Terkos nâhiyesinde Tahir Fakīh cibâyetine tâbi‘ Gölbaşı demekle ma‘rûfe Küçük Belgrad nâm karyede vâki‘ hudûdunun bir cânibi Büyük İncirli tarla demekle ma‘rûfe olan mezra‘aya ve bir cânibi Merkeb Deresi nâm mevzi‘e ve bir cânibi Macarlar sınırı demekle ma‘rûfe olan mevzi‘e ve bir cânibi Celebköyü sınırına müntehiye olup ilâ hîni’t-tefvîz taht-ı tasarrufumda olan tahmînen altmış müdlük tohum istî‘âb eden mezâri‘in ve Nalband çayırı demekle ma‘rûfe iki kıt‘a çayırın hakk-ı tasarrufunu sâhib-i arz ma‘rifetiyle müvekkil-i müşârunileyh İsmail Efendi’ye tefvîz ve teslîm eylediğimde, mûmâ-ileyh dahi vech-i meşrûh üzre tefevvuz ve tesellüm eyledikden sonra mukābele-i tefvîzde yedinden kırk beş bin nakd-i râyic fi’l-vakt fiddîsin alıp kabz eyledim. Min ba‘d zikirleri sebk eden mezâri‘ ve çayırlar müvekkil-i mûmâ-ileyh İsmail Efendi’nin taht-ı tasarrufunda olup ve zikr olunan mezâri‘ ve çayırların dâhilinde vâki‘ olan biçilmiş otluk ve kat‘ olunmuş odunların cümlesi müvekkil-i mûmâ-ileyhin mülk-i mahzıdır benim alâkam yokdur dedikde, mukırr-ı merkūm Mehmed Bey’in minvâl-i meşrûh üzre sudûr eden i‘tirâfını merkūm el-Hâc İbrahim dahi bi’l-vekâle tasdîk ve müvekkil-i merkūmun vech-i muharrer üzre tefevvuz ve kabûl ettiğin tahkīk edicek, mâ vaka‘a bi’t-taleb ketb ve tahrîr olundu. Tahrîren sâbi‘u’l-Muharremi’l-harâm li sene selâsin ve erba‘în ve elf. Şuhûdü’l-hâl: Mehmed Efendi el-Müderris, Ramazan b. Osman el-Müezzin, Mehmed rûznâmeci der Vakf-ı Ayasofya, Hüseyin Bey vekîl-i harc der-vakf-ı mezbûr, el-Hâc Abdülcelil el-Câbî, el-Hâc İbrahim Bey el-bevvâb, Mustafa Bey kethüdâ-yı çiftlik, Murad Bey tâbi‘-i İsmail Ağa, Ali Bey b. Sinan, Osman Beşe er-Râcil, el-Hâc Mustafa Beşe er-Râcil ve gayruhüm mine’l-huzzâr.