Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 141 Hüküm no: 123 Orijinal metin no: [23b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Mehmed’in kendisini yaralayan Osman b. Abdullah ile sulh olduğu Dergâh-ı âlî -dâme mahfûfen bi’l-me‘âlî- yeniçerilerinin otuz sekizinci cemâ‘atinden Ali Beşe b. Mehmed nâm râcil meclis-i şer‘-i şerîfde, havâss-ı Kostantıniyye muzâfâtından Aya İstefanoz nâm karye sâkinlerinden Osman b. Abdullah nâm kimesne mahzarında bi’t-tav‘i’s-sâf ikrâr ve i‘tirâf edip, bundan akdem mezbûr Osman karye-i mezbûrede bi gayri vechin amden çeneme vurup alt dişlerimin sol tarafından iki dişimi çıkardıkda, mûcebini mezbûrdan da‘vâ ve taleb eylediğimde ol dahi inkâr edip, beynimizde münâza‘ât-ı kesîre ve muhâsamât-ı şedîde vâkı‘a olmuş idi. El-hâletü hâzihî beynimizde muslihûn tavassut edip husûs-ı mezbûrdan beni an-inkâr mezbûr Osman ile beş yüz nakd-i râyic fi’l-vakt akçe üzerine sulh ettiklerinde, ben dahi sulh-ı mezbûru kabûl ve bedel-i sulh olan meblağ-ı mezbûr beş yüz akçeyi merkūm Osman yedinden bi’t-tamâm ve’l-kemâl alıp kabz edip, zimmetini husûs-ı mezkûrdan ibrâ-i âm ile ibrâ ve iskāt-ı tâm ile iskāt eyledim. Ba‘de’l-yevm husûs-ı mezbûra müte‘allik nizâ‘ benden bi’z-zât veya vekîlimden bi’l-vâsıta mezbûr Osman Efendi’den sudûr ederse lede’l-hükkâmi’l-kirâm mesmû‘a ve makbûle olmaya dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâdis ve’l-ışrîn min Saferi’l-hayr li sene selâsin ve erba‘în ve elf. Şuhûdü’l-hâl: Fahrü’l-a‘yân Ahmed Ağa b. Mahmud, Hasan Beşe b. Mustafa, Osman b. Veli, Kurd Beşe b. Ali.