Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 140 Hüküm no: 122 Orijinal metin no: [23b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori v. Dimitri’nin evini bey‘ bi’l-istiğlâl ile Murtaza Paşa Vakfı’na sattığı Mevlânâ Mehmed Efendi b. Mehmed nâm kadı, taleb üzerine husûs-ı âtiyyü’z-zikri tahrîr için irsâl olunup, ebvâb-ı hısn-ı mahmiye-i Kostantıniyye’den hâric-i bâb-ı Balat’da vâki‘ Todori v. Dimitri nâm zimmînin menziline vâsıl oldukda akd-i meclis eyledi. Zimmî-i mezkûr meclis-i şer‘-i şerîfde işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu, mahalle-i mezbûrede kâin, bir tarafdan Niyaki b. Karaca mülkü, diğer tarafdan İstemad Kargun mülkü, öteki tarafdan sâhil-i bahr ve diğer tarafdan da tarîk-i âm ile mahdûd cemî‘-i menzilini cümle tevâbi‘ ve levâhıkı ve kâffe-i menâfi‘ ve levâhıkı iken râyicü’l-vakt yüz yirmi bin akçe semen-i mu‘ayyen-i makbûzla merhûm Murtaza Paşa Vakfı’na kāimmakām-ı mütevellî olan hâmil-i hâze’l-kitâb umdetü’l-emâcid ve’l-ekârim câmi‘u’l-mehâmid ve mekârim Ahmed Ağa b. Mustafa’ya bey‘ ettiğini ikrâr ve i‘tirâf etti. Müşterî-i merkūm da vakf-ı mezkûr mâlıyla ve istiğlâl maksadıyla menzil-i mesfûru iştirâ etti. Bâyi‘-i mezkûrun menzili icâreye almak istemesi üzerine müşterî-i mûmâ ileyh ba‘de’t-tahliye ve’t-tekābuz zeyilde mezkûr târihden bir sene tamâmına on beş bin akçe ücret-i kirâ ile icâreye verdi. Vâki‘ ikrâr, müşârun ileyh Ahmed Ağa tarafından vicâhen ve şifâhen tasdîk edildi. Sonra Nikol Veyuda v. İstefan nâm zimmî ve müste’cir-i mezbûrun zevci olan Asula bt. Dimo nâm zimmîyye menzil-i mezbûrun derkine ve ücret-i kirâya îcâb ve kabûlü hâvî kefâletle kefil oldu. Mevlânâ-yı mezbûr, vukū‘-i hâl-i alâ hâze’l-minvâli haber verdi. Vaka‘a’l-işhâd ve’t-tahrîr fî gurreti Saferi’l-hayr sene selâse ve erba‘în ve elf. Şuhûdü’l-hâl: Fahrü’l-a‘yân Ahmed Çavuş b. Abdülmennân, Ali Çelebi b. Abdullah, Mehmed Beşe b. Yusuf çukadâr, Mehmed b. Mehmed