Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 142 Hüküm no: 125 Orijinal metin no: [23b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sahibi bt. Şoya’nın Mehmed b. Mehmed’den kazancı dükkânı kirası bedelini tahsil ettiği Mahmiye-i Kostantıniyye’de Meydancık mahallesinde sâkine olan Sahibe bt. Şoye nâm Yahudiye tarafından husûs-ı âti’z-zikri ikrâra vekîl olup, vekâleti mahzar-ı hasm-ı câhidde İsmail b. Mehmed ve Mehmed b. Ali nâm kimesneler şehâdetleri ile sâbite olan Yuda v. Yako nâm Yahudi meclis-i şer‘de Mircel tâyifesinden işbu bâ‘isü’l-kitâb Mehmed b. Mehmed nâm kimesne mahzarında bi’l-vekâle ikrâr ve takrîr-i kelâm edip, müvekkil-i merkūm Sahibe mahmiye-i mersûmede Mahmudpaşa nâm mevzi‘ kurbunda Çukacılar Çarşısı’nda vâki‘ olup, kendiye intimâ ile tahdîd ve tavsîfden müstağnî olan bir bâb mülk çukacı dükkânı[nı] mezbûr Mehmed’e târih-i kitâb senesi şehr gurresinden senede on beşer bin üç yüz akçeden kırk beş bin dokuz yüz akçe icâre-i müeccele ile üç sene tamâmına değin îcâr ve teslîm eyledikde, mezbûr Mehmed dahi minvâl-i muharrer üzre istîcâr ve tesellüm eyledikden sonra müvekkile-i merkūme Sahibe bir senenin ücreti olup sâbıku’z-zikr olan on beş bin üç yüz akçeyi ber vech-i peşîn müste’cir-i merkūm Mehmed yedinden alıp kabz eyledi dedikde, mukırr-ı merkūm Yuda yahudinin bi’l-vekâle sudûr eden i‘tirâfını merkūm Mehmed dahi bi’l-muvâcehe tasdîk ve vech-i meşrûh üzre istîcâr ve kabûl eylediğini tahkīk edicek, mâ vaka‘a bi’t-taleb ketb olundu. Tahrîren fi’l-yevm fî evâhiri Saferi’l-muzaffer li sene selâsin ve erba‘în ve elf. Şuhûdü’l-hâl: İbrahim b. Mehmed, Mehmed Bey b. Yusuf, Veli Ağa b. Mustafa, el-Hâc Hüseyin b. Mehmed, Piyâle Çavuş b. Abdullah.