Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 147 Hüküm no: 131 Orijinal metin no: [25a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Efendi b. Ali’nin menzilini Hüseyin Efendi b. Mustafa’ya sattığı Husûs-ı âti’l-beyânı ketb ve tahrîr için savb-ı şer‘-i hatîrden nâib taleb olundukda, fahrü’l-müderrisîn es-Seyyid Mehmed Efendi b. es-Seyyid Mehmed irsâl olunup, zeyl-i kitâbda mastûrü’l-esâmî olan müslimîn ile mahmiye-i Kostantıniyye’de Muhtesib Karagöz mahallesi ahâlîsinden olup bundan akdem yeniçeri ocağından sekbanbaşı olan umdetü’l-emâcid ve’l-a‘yân Kurd Ağa’nın menziline varıp akd-i meclis-i şer‘ eylediklerinde, mahmiye-i merkūmede Kalenderhâne mahallesi ahâlîsinden olup bundan esbak Tuna Defterdârı olan fahrü’l-emâcid ve’l-ekârim câmi‘i’l-mehâmid ve’l-mekârim Mustafa Efendi b. Ali meclis-i mesfûrda, zikr olunan yeniçeri ocağından başhalîfe olan râfi‘ü’l-kitâb fahrü erbâbi’l-kalem zahrü ashâbi’r-rakam Hüseyin Efendi b. Mustafa mahzarında bi’t-tav‘i’s-sâf ikrâr ve i‘tirâf edip, medîne-i Ebâ Eyyûb-i Ensârî -radiye anhu Rabbuhü’l-bârî- mahallâtından Câmi‘-i Atîk mahallesinde vâki‘ muhavvata-i dâhiliyesi üç beyt-i süflîyi ve iki sofayı ve mahzeni ve mutfağı ve iki beyt-i ulvîyi ve iki ulvî sofayı ve fırını ve bi’r-i mâyı ve kenîfi ve eşcâr-ı müsmire ve gayr-ı müsmireyi hâviye cüneyneyi ve muhavvata-i hâriciyesi dört beyt-i süflîyi ve sofayı ve mutfağı ve ıstablı ve gurfeyi ve bi’r-i mâyı ve kenîfi ve eşcâr-ı müsmire-i mütenevvi‘ayı hâviye hadîkayı müştemile olup, bir tarafı Aişe Hâtun bt. Osman mülkü ve bir tarafı Süleyman Efendi mülkü ve bir tarafı merhûm Atûfî Efendi mülkü ve bir tarafı sâhil-i bahra muttasıl tarîk-i âm ile mahdûd olup, ilâ hîni’l-akd mülk-i mahz-ı sahîhim olan menzili cemî‘-i cümle tevâbi‘ ve levâhıkı ve kâffe-i menâfi‘ ve merâfıkı ile mûmâ-ileyh Hüseyin Efendi’ye dört yüz bin otuz sekiz bin nakd-i râyic fi’l-vakt fıddî akçeye bey‘-i bât-ı sahîh-i şer‘î ile bey‘ ve teslîm eylediğimde, müşârunileyh dahi vech-i meşrûh üzre iştirâ ve kabûl edip, semen-i merkūm dört yüz bin ve otuz bin akçeyi bi’t-tamâm ve’l-kemâl meclis-i mezkûrda yedinden alıp kabz eyledim. Min ba‘d semen-i merkūmdan zimmetinde bir akçe ve bir habbe kalmayıp menzil-i merkūm mülk-i müşterâsı olmuşdur, keyfe mâ yeşâ ve yahtâr mutasarrıf olsun dedikde, müşârunileyh Mustafa Efendi’yi kelimât-ı meşrûhasında mûmâ-ileyh Hüseyin Efendi dahi bi’l-muvâcehe tasdîk ve minvâl-i muharrer üzre iştirâ ve kabûl eylediğini tahkīk eyledikden sonra bâyi‘-i mûmâ-ileyh Mustafa Efendi’nin halîlesi fahrü’l-muhadderât Aişe Hâtun bt. Hasan Bey’in vech-i âtî üzre sudûr eden ikrârını tahrîr için menziline vardıkda, merkūme Aişe Hâtun zevci mûmâ-ileyh Mustafa Efendi mahzarında ikrâr edip, zevcim Mustafa Efendi menzil-i mahdûd-ı mezkûru bundan akdem bin yirmi üç senesi Şevvâli’l-mükerreminin yirmi altıncı gününden üç sene tamâmına değin müeccel olmak üzre bey‘ bi’l-vefâ tarîki ile bana üç bin altı yüze bey‘ edip kabz-ı semen ve teslîm-i mebî‘ eyledikden sonra ecel-i merkūma hulûl eyledikde semen-i merkūm üç bin altını bana def‘ ve teslîm edip menzil-i merkūmu kabz ve tesellüm eyledi idi. İle’l-ân zikr olunan menzil mûmâ-ileyh Mustafa Efendi’nin mülkü olup benim bir vechile alâkam kalmamışdır dedikde, müşârunileyhâ Aişe Hâtun’u kelimât-ı meşrûhasında mûmâ-ileyh Mustafa Efendi dahi bi’l-muvâcehe tasdîk eylediğini mevlânâ-yı mûmâ-ileyh mahallinde ketb ve tahrîr edip, ba‘dehû gelip vukū‘u üzre ihbâr ve takrîr edicek, mâ vaka‘a bi’t-taleb ketb olundu. Tahrîren fi’l-yevmi’l-ışrîn min Saferi’l-hayr li sene selâsin ve erba‘în ve elf. Şuhûdü’l-hâl: Fahrü’l-emâcid Muslihiddin Ağa kethüdâ-yı yeniçeriyân sâbıkan, Hüseyin Subaşı b. Keyvan, İbrahim Efendi b. Ali el-Kâtib, Şaban b. Rıdvan kâtib-i yeniçeriyân, Hüseyin Subaşı b. Mehmed, Derviş Bey b. Abdullah kethüdâ-yı yesâriyân, Mehmed Bey b. Hurrem el-Yesârî, Mustafa Çelebi b. Ali el-Kâtib, Mustafa b. Ali kisedâr, Ali Beşe b. Abdullah er-Râcil, Receb Çelebi b. Ahmed, Mehmed b. Mustafa el-Kâtib, Receb b. Abdullah, Hasan b. Sefer [Yusuf] …? süvârî, Hüseyin Beşe b. Sefer er-Râcil, Ahmed Beşe b. Musa, Hüseyin b. Gāzi Bâli, Mehmed b. Cafer, Hüseyin Çelebi el-bevvâb, Ali b. Mustafa.