Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 149 Hüküm no: 134 Orijinal metin no: [25b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şeyh Süleyman Efendi vakfı menzilin Neslihan bt. İsa’nın tasarrufunda olduğu ve Mehmed Çelebi b. İbrahim’in talebinin reddi Mahmiye-i Kostantıniyye’de Sofular mahallesi sükkânından Mehmed Çelebi b. İbrahim nâm kimesne meclis-i şer‘de, zevcesi bâ‘isetü’l-kitâb Neslihan bt. İsâ nâm hâtun mahzarında takrîr ve da‘vâ edip, mahmiye-i merkūmede merhûm Şeyh Süleyman Efendi Vakfı’ndan mahalle-i mersûmede vâki‘ olup bir tarafı vâkıf-ı merkūm zâviyesi ve iki tarafı Ferhad Bey Vakfı ve bir tarafı tarîk-i âm ile mahdûd olup, bir fevkānî odayı ve bir köşkü ve bir tahtânî beyti ve cüneyneyi ve kenîfi ve bi’r-i mâyı ve muhavvatayı müştemil olup, elân merkūmenin yedinde olan menzil mukaddemâ ücret-i mu‘accele-i ma‘lûme ve mâh be mâh kırkar akçe icâre-i müeccele ile babam merkūm İbrahim’in yedinde olup, ba‘de vefâtihî bi hasebi’l-kānûn hakk-ı tasarrufu bana intikāl etmiş iken merkūm Neslihan bi gayri vech-i şer‘î vaz‘-ı yed edip tasarruf eder, kasr-ı yedine tenbîh olunmak taleb ederim dedikde, gıbbe’s-suâl mezbûre Neslihan Hâtun cevâbında, fi’l-vâki‘ menzil-i merkūm vech-i mersûm üzre müteveffâ-yı merkūm İbrahim’den bi hasebi’l-kānûn oğlu mezbûr Mehmed Çelebi’ye intikāl ettikden sonra mezbûr Mehmed Çelebi dahi menzil-i merkūmun hakk-ı tasarrufunu mütevellî-i vakf ma‘rifeti ile bana tefvîz ve teslîm edip, mukābele-i tefvîzde yedimden on beş bin nakd-i râyic fi’l-vakt fiddî akçem alıp kabz edip yedime hüccet-i şer‘iyye verilmiş idi deyü bin otuz dokuz senesi şehr-i Muharremü’l-harâmının ikinci günü târihiyle müverraha ve târih-i merkūmda mahmiye-i mersûmede Saraciye? Mahkemesinde nâibü’ş-şer‘ olan Mehmed b. Ahmed’in hat ve hâtemini hâviye mefhûmu takrîr-i meşrûhuna mutâbıka ve minvâl-i muharrer üzre tefevvuz ve tesellümü nâtıka hüccet-i şer‘iyye ibrâz edicek, gıbbe’s-suâl mezbûr Mehmed Çelebi mazmûn-ı hüccet-i merkūmeyi bi’l-külliye münkir olup, merkūme Neslihan Hâtun’dan takrîr-i meşrûhuna mutâbıka beyyine taleb olundukda, zeyl-i kitâbda mastûrü’l-esâmî olan udûl-i müslimînden Halil Efendi b. Hâbil el-İmâm ve Ali Çelebi b. Pîrî nâm kimesneler li ecli’ş-şehâde hâzırân olup akībe’l-istişhâd, fi’l-vâki‘ menzil-i merkūm vech-i mersûm üzre müteveffâ-yı merkūm İbrahim’in oğlu Mehmed Çelebi’ye intikāl eyledikden sonra mezbûr Mehmed Çelebi dahi menzil-i merkūmun hakk-ı tasarrufunu mütevellî-i vakf-ı merkūm ma‘rifetiyle zevcesi merkūme Neslihan Hâtun’a tefvîz ve teslîm edip ve mukābele-i tefvîzde yedinden on beş bin nakd-i râyic fi’l-vakt fiddî akçesin alıp kabz edip yedine hüccet-i şer‘iyye verildi idi. Bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde, ba‘de ri‘âyeti şerâiti’l-kabûl şehâdetleri makbûle olup, mûcebiyle menzil-i merkūm mersûm Neslihan Hâtun’un yedinde ibkā olunup, merkūm Mehmed Çelebi bi gayri vech-i şer‘î mütâlebeden men‘ olundu. Tahrîren evâhiri Saferi’l-mu‘azzam li sene selâsin ve erba‘în ve elf. Şuhûdü’l-hâl: Hasan b. Ahmed, Yahya b. Zekeriya, Yusuf Bey b. Abdullah, Piyâle Çavuş b. Abdullah, Mehmed b. Hasan ve gayruhüm mine’l-huzzâr.