Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 150 Hüküm no: 135 Orijinal metin no: [26a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Litroz ve Ayvalıdere’deki Sultan Bayezid vakfı arazilerin tasarrufunun Osman Bey b. Hızır Paşa’da olduğu ve Ferhad Paşa vârislerinin talebinin reddi Bundan akdem mağdûben katl olunan Ferhad Paşa’nın sulbî oğlu olup, bundan akdem vefât eden Ahmed Bey’in sulbî kebîr oğulları Mustafa Çelebi ve Mehmed Bey ve İbrahim Bey meclis-i şer‘-i şerîfde, dergâh-ı âlî -dâme mahfûfen bi’l-me‘âlî- kapıcıbaşılarından umdetü’l-emâcid ve’l-ekârim müstecmi‘u’l-mehâmid ve’l-mekârim Osman Bey b. el-merhûm Hızır Paşa mahzarında her biri takrîr-i da‘vâ edip, merhûm ve mağfûrun leh Sultan Bayezid Hân -aleyhi’r-rahmetü ve’l-gufrân- evkāfından hâlâ müşârunileyh Osman Bey’in yedinde ve taht-ı tasarrufunda olan Havâss-ı Aliyye muzâfâtından Litroz nâm karye sınırı dâhilinde ve Ayvalıdere nâm karye sınırı dâhilinde mevâzi‘-i şettâda vâki‘ her birinin hudûdu beynimizde ve lede’l-ahâlî ve’l-cîrân ma‘lûme olmakla tahdîd ve tavsîf ve beyân ve ta‘rîfden müstağnî olan ( ) kıt‘a tarla ( ) kıt‘a çayırı ( ) kıt‘a bostan yeri merhûm-ı maktûl-i mezbûr Ferhad Paşa’nın taht-ı tasarrufunda olup, târih-i kitâbdan otuz sekiz sene mukaddem katl olundukda arâzi-i mezbûrenin hakk-ı tasarrufu kānûn üzre babamız müteveffâ-yı mezbûra intikāl edip, ol dahi vefât eyledikde, kānûn-ı sultânî üzre bize intikāl etmiş iken müşârunileyh Osman Bey arâzi-i mezkûreye bi gayri vech vaz‘-ı yed eder suâl olunup kasr-ı yed ettirilip bize teslîme tenbîh olunmak matlûbumuzdur dediklerinde, gıbbe’s-suâl mûmâ-ileyh Osman Bey cevâbında, fi’l-hakīka arâzi-i mezkûre mukaddemâ maktûl-i mezbûr Ferhad Paşa’nın taht-ı tasarrufunda olup, târih-i kitâbdan otuz sekiz sene mukaddem mağdûben katl olundukda taraf-ı mîrîden zabt olunup, ba‘dehû târih-i mezbûrda arazî-i mezkûreyi merhûm ve mağfûrun leh Sultan Mehmed Hân -aleyhi’r-rahmetü ve’l-gufrân- hazretleri hemşîreleri merhûme ve mağfûrun lehâ Fâtıma Sultan’a ve mütevellî-i vakf izin ve ma‘rifetiyle tefvîz edip, vâlidem müşârunileyhânın vefâtından sonra arâzi-i mezkûre mahlûle olup âhara tefvîz olunmak lâzım geldikde tefvîzine ben râgıb olup, Ayvalıdere sınırı dâhilinde olan tarlaların hakk-ı tasarrufunu on dokuz senesi şehr-i Ramazânü’l-mübârekinde vakf-ı mezbûr mütevellîsi olan Mustafa Bey bana iki bin akçe bedel-i tefvîz ile ve yedime hat ve hâtemini müştemile tezkire verip ve Litroz sınırı dâhilinde olan arâzinin hakk-ı tasarrufu[nu] bin yirmi senesi Saferi’l-hayrında vakf-ı mezbûr mütevellîsi olan Sinan Ağa yirmi bin nakd-i râyic fi’l-vakt akçe bedel-i tefvîz bana tefvîz edip, kezâlik yedime hat ve hâtemini müştemil tezkire verip, arâzi-i merkūmeyi târih-i mezbûrdan târih-i kitâba gelince mutasarrıf olup zirâ‘at ve harâset edip öşr ve resmin ve mukāta‘asın cânib-i vakf-ı mezbûra edâ ederim, Ayvalıdere sınırında olan tarlalar yirmi beş seneden beri ve Litroz sınırında olan arâzi on yedi seneden beri taht-ı tasarrufumdadır deyü kelâmını nâtıka ve târiheyn-i merkūmeyn ile müverraha ve mütevelliyeyn-i merkūmeynin hat ve hatemlerini müştemile iki kıt‘a tezkire ibrâz edip nazar ve kırâ’at olundukda, mazmûnları takrîr-i meşrûhuna muvâfık bulunmağın, müdde‘ûn-ı merkūmûn istintâk olunduklarında cevâblarında, fi’l-hakīka hâl zikr olunan minvâl üzredir deyü mûmâ-ileyh Osman Bey’in kelâmını ve zikr olunan iki kıt‘a tezkirenin mazmûnlarını her biri i‘tirâf etmeğin, bu mikdâr zamândan beri arâzi-i mezkûrenin öşr ve resmin ve mukāta‘asın sâhib-i arza edâ eyleyip mutasarrıf olmağın, arâzi-i merkūme mûmâ-ileyh Osman Bey’in yedinde ibkā olunup, müdde‘ûn-ı merkūmûnun her biri müşârunileyhe min ba‘d bî-vech mu‘ârazadan men‘ birle, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sânî min şehri Rebî‘ilevvel li sene selâsin ve erba‘în ve elf. Şuhûdü’l-hâl: Umdetü’l-emâcid Ali Ağa b. Hasan el-Cündî, Umdetü erbâbi’t-tahrîr ve’l-kalem Mustafa Efendi tezkireci-i sadr-ı a‘zam, Mahmud Efendi tezkireci-i sadr-ı a‘zam, Umdetü’l-emâcid Mehmed Ağa, Mustafa [Efendi] el-Müderris, Ali Efendi b. Atazâde, Yusuf Ağa el-Cündî, İsmail b. Turgud, Yusuf Efendi b. ( ), Hüseyin Efendi el-Müderris.