Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 153 Hüküm no: 138 Orijinal metin no: [26b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aişe Hatun bt. Hasan Ağa’nın menzilini Karaçelebizâde Evkâfı’na bey‘ bi’l-istiğlâl yoluyla sattığı Husûs-ı âti’l-beyânın mahallinde tahrîri iltimâs olmağın savb-ı şer‘den Mevlânâ Mehmed Efendi b. Mehmed el-kadı irsâl olunup, ol dahi zeyl-i kitâbda mastûrü’l-esâmî müslimîn ile mahmiye-i İstanbul’da sâbıkan Temeşvâr Defterdârı olan Mustafa Efendi b. Ali[’nin] sâkin olduğu menzile varılıp akd-i meclis olundukda, mezbûr Mustafa Efendi’nin hâlâ zevcesi olup Müstakīm bt. Abdullah ve Safa bt. ( ) nâm hâtunlar ta‘rîfleriyle mu‘arrefe olan fahrü’l-muhadderât Aişe Hâtun bt. Hasan Ağa meclis-i şer‘-i lâzımü’t-teşrîfde, merhûm ve mağfûrun lehâ Hatice Hâtun bt. el-merhûm Hüsam Efendi eş-şehîr bi Karaçelebizâde evkāfına bi’l-fi‘il mütevellî olan fahrü’l-eimmeti’l-kirâm Mehmed Efendi b. Ali mahzarında bi’t-tav‘i’s-sâf ikrâr ve i‘tirâf edip, silk-i mülkümde münselik mahalle-i mezbûrede vâki‘ iki tarafı Kurd Ağa b. ( ) mülkü ve bir tarafı Hasan Bey b. ( ) mülkü ve bir tarafı tarîk-i âm ile mahdûd mülk menzilimi, bin kırk üç senesi Rebî‘ulûlâ gurresinde tarafeynden îcâb ve kabûlü hâvî bey‘-i bât-ı sahîh-i şer‘î ile mezbûr Mehmed Efendi’ye yüz seksen bin nakd-i râyic fi’l-vakt akçeye bey‘ edip, ol dahi mütevellîsi olduğu mâl-ı vakf-ı mezbûr ile vakf için iştirâ ve kabz ve tesellüm eyledikden sonra yine târih-i mezbûrdan bir sene tamâmına değin menzil-i mahdûd-ı mezkûru yirmi yedi bin mezbûru’n-na‘t akçe icâre ile bana îcâr edip, ben dahi minvâl-i meşrûh üzre istîcâr ve kabûl eyledim dedikde, mukırra-i mezbûrenin vech-i muharrer üzre cârî ve sâdır olan ikrârını mütevellî-i mezbûr Mehmed Efendi vicâhen tasdîk ve şifâhen [tahkīk] eyleyip, ba‘dehû menzil-i mezbûrun derkine bâyi‘a-i müşârunileyhânın zevci mezkûr Mustafa Efendi emr ve kabûlü hâviye kefâlet ile kefîl oldukdan sonra vâki‘ hâli Mevlânâ-yı mezbûr mahallinde tahrîr edip, ba‘dehû meclis-i şer‘e gelip vukū‘u üzre ihbâr ve takrîr-i etmeğin, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ min şehri Rebî‘ilevvel li sene selâsin ve erba‘în ve elf. Şuhûdü’l-hâl: Fahrü’l-kuzât Ataullah Efendi b. el-Hâc Hüseyin el-kadı, Mustafa Efendi b. Abdülmümin eş-şehîr Şeyhzâde, Fahrü’l-eimme Mahmud Efendi b. Seydî, Fahrü’l-akrân Hasan Bey b. Mustafa, Hasan Çavuş b. Abdülmennân, Mehmed Efendi b. Mustafa, Receb b. Bâli, Musli b. Musa, Ali b. Abdi.