Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 152 Hüküm no: 137 Orijinal metin no: [26b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sikender v. Agob Sultan Mehmed Vakfı reâyâsından olduğundan İstanbul’da cizye vergisini toplamaya memur Avasıl’ın talebinin reddi Vilâyet-i Anadolu’da Divriği kazâsına tâbi‘ Kesme nâm karye ahâlîsinden Avasıl v. ( ) nâm Ermeni meclis-i şer‘-i hatîr-i lâzımü’t-tevkīrde, işbu hâmilü’l-kitâb Sikender v. Agob nâm şâb Ermeni muvâcehesinde takrîr-i kelâm ve bast-ı merâm edip, karye-i mezbûre ahâlîsinden olup mahmiye-i İstanbul’da kâr u kisb üzre olan zimmîlerden baş harâclarını cem‘e me’mûr olmağın, mezbûr Sikender’in babası mezkûr Agob karye-i mezbûre ahâlîsinden olmakla sulbî oğlu mezkûr Sikender’in işbu bin kırk senesinde üzerine lâzım gelen iki yüz yetmiş akçe baş harâcını mezkûr Sikender’den taleb eyledikde, vermede ta‘allül eder suâl olunup alıverilmek matlûbumdur dedikde gıbbe’s-suâl mezbûr Sikender cevâbında, ben merhûm ve mağfûrun leh Sultan Mehmed Hân -aleyhi’r-rahmetü ve’l-gufrân- Vakfı re‘âyâsına mülhak olup cizye-i re’simi vakf-ı mezbûr mütevellîlerine edâ ederim, hattâ vech-i meşrûh üzre vakf-ı mezbûr re‘âyâsından olduğumu defter-i vakf nâtıkdır deyü hâlâ vakf-ı mezbûr mütevellîsi olan fahrü’l-a‘yân Süleyman Bey’i defter-i vakf ile ihzâr edip mezbûr Süleyman Bey istintâk olundukda, mezbûr Sikender mütevellîsi olduğum vakf-ı mezbûr re‘âyâsındandır, mezbûrun cizye-i re’sini her sene cânib-i vakf için ben ahz u kabz [ederim] dedikde, mezbûr Avasıl min ba‘d bi gayri vech mezbûr Sikender’e mu‘ârazadan men‘ olunup, mâ hüve’l-vâki‘ bi’t-taleb ketb olundu. Tahrîren fi’l-hâdî aşer fî Saferi’l-hayr li sene selâsin ve erba‘în ve elf. Şuhûdü’l-hâl: Yusuf Ağa b. Kadı reisü’l-muhzırîn, Mehmed Ağa b. ( ), Mehmed Beşe b. Yusuf çukadâr, Mehmed b. Abdullah.