Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 155 Hüküm no: 141 Orijinal metin no: [27a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muhzırbaşı Sinan Bey Vakfı menzillerinin kiracısı Cafer Efendi b. Şeyh Behrâm’ın bunları kiralamaktan vazgeçip vakıf hakdarı Zahide Hatun’a devrettiği Mahmiye-i Kostantıniyye’de nefs-i Balat’da Camcı Muhyiddin mahallesinde sâkin olup belde-i Vize’de iftâya me’mûr olan fahrü’l-ulemâ Cafer Efendi b. el-merhûm Şeyh Behrâm meclis-i şer‘-i hatîr-i lâzımü’t-tevkīrde, mahmiye-i merkūmede vâki‘ merhûm Muhzırbaşı Sinan Bey nâm sâhibü’l-hayrın atîki Zülfikar b. Abdullah nâm kimesnenin sulbiye kızı ve âti’z-zikr olan iki bâb vakıf menzilin meşrûtun-aleyhâsı olan bâ‘isetü’l-kitâb Zahide Hâtun mahzarında bi tav‘ihî ikrâr ve takrîr-i kelâm edip, merhûm-ı müşârunileyh Sinan Bey Vakfı’ndan mahalle-i merkūmede vâki‘ olup, bir tarafı Sekbanbaşı mülkü demekle ma‘rûf menzil ve bir tarafı Mosi nâm Yahudi mülkü ve bir tarafı Samarya nâm Yahudiye mülkü ve bir tarafı tarîk-i âm ile mahdûd olan menzil ile medîne-i Ebâ Eyyûb-i Ensârî mahallâtından Baba Haydar mahallesinde vâki‘ olup, bir tarafı Sağır Şeyh mülkü ve bir tarafı Ebûbekir Çelebi mülkü ve bir tarafı Papuççu Ebûbekir mülkü ve bir tarafı tarîk-i âm ile mahdûd olup merkūme Zahide’nin meşrûtun-aleyhâsı olan iki bâb menzil mukaddemâ benim yedimde olmakla, zikr olunan menzilin her birinin ba‘zı mevzi‘ini izn-i mütevellî ile ta‘mîr edip mâlımdan küllî akçe sarf eylemiş idim. El-hâletü hâzihî zikr olunan menzilleri hasbemâ şarti’l-vâkıf merkūme Zahide Hâtun’a teslîm edip vech-i meşrûh üzre sarf eylediğim meblağ mukābelesinde merkūmenin yedinden iki bin akçe alıp kabz edip, mâ‘adâsından merkūmenin zimmetini ibrâ ve iskāt eyledim. Min ba‘d zikr olunan menzillerde bir vechile alâkam yokdur dedikde, müşârunileyh Cafer Efendi’yi kelimât-ı meşrûhasında merkūme Zahide Hâtun dahi bi’l-muvâcehe tasdîk edicek, mâ vaka‘a bi’t-taleb ketb olundu. Tahrîren fî evâ’ili Rebî‘ulâhir li sene selâsin ve erba‘în ve elf. Şuhûdü’l-hâl: Ahmed Efendi b. Abdülgaffâr müfettişü’l-evkāf sâbıkan, Hasan Efendi el-kadı, Abdullah Efendi …?, Hasan Çavuş el-Mübâşir, Yusuf Bey el-Cündî.