Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 156 Hüküm no: 142 Orijinal metin no: [27a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Reis Vakfı’na ait menzilin icâreteyn yoluyla Saliha Hatun’a kiralandığı Mahmiye-i Galata mahallâtından Şehsuvar mahallesinde vâki‘ bir tarafı el-Hâc Ali b. ( ) mülkü ve bir tarafı Ali Reis Vakfı ve bir tarafı tarîk-i hâs ve bir tarafı tarîk-i âm ile mahdûd olup, merhûm Mehmed Reis vakf edip süknâsını evvelâ kendi nefsine ba‘dehû zevcesi Kâmile bt. Abdullah nâm hâtuna ba‘dehâ mu‘tekası Yasemin bt. Abdullah’a ve ba‘dehû mu‘tekası Rahime bt. Abdullah nâm hâtuna şart eylediği menzilin hâlâ hasbî mütevellîsi olan fahrü kuzâti’l-İslâm Şaban Efendi b. Mehmed meclis-i şer‘-i hatîr-i lâzımü’t-tevkīrde, işbu hâfızatü’l-kitâb Saliha bt. ( ) nâm hâtun mahzarında takrîr-i kelâm edip, vâkıf-ı mezbûr ve zevcesi mezkûre Kâmile ve mu‘tekası mesfûre Yasemin mutasarrıfesi olup, hâlâ nevbet-i tasarruf menzil-i mezbûr-ı mezkûrda Rahime’nin olup, lâkin işrâf-ı küllî ile harâbe müşrif olup ta‘mîr ve meremmetine cânib-i vakıfda müsâ‘ade dahi olmamağın, menzil-i mezbûru merkūme Rahime’nin rızâsıyla âhara icâre-i mu‘accele ve müeccele ile îcâr etmek lâzım geldikde, mezkûre Saliha Hâtun tâlibe ve râgibe olmağın, cânib-i vakf için yedinden iki bin akçe icâre-i mu‘accele alıp kabz edip, târih-i kitâb şehri gurresinden beher mâh otuzar akçe ücret-i müeccele ile merkūme Saliha Hâtun îcâr edip, ol dahi istîcâr ve kabûl eyledikden sonra menzil-i mezbûrda icâre-i mu‘accelesine mahsûb olmak üzre kendi mâlından ebniye ihdâsına izin verdim dediğinde, mütevellî-i müşârunileyhin minvâl-i meşrûh üzre ve cârî ve sâdır olan kelâmını mezkûre Saliha Hâtun vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ min şehri Rebî‘ilâhir li sene selâsin ve erba‘în ve elf. Şuhûdü’l-hâl: Ali Halîfe b. ( ) el-İmâm, Mustafa Çelebi b. Şaban Efendi, Mehmed Reis b. Murad, el-Hâc Perviz, el-Hâc Ali b. Kasım, el-Hâc Murad [b.] Abdullah, Kabil b. Abdullah, el-Hâc Hasan? b. ( ).