Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 161 Hüküm no: 150 Orijinal metin no: [28b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Subaşı b. Ahmed’in, evini karısı Belkıs Hatun bt. Abdullah’a sattığı Mahmiye-i Kostantıniyye mahallâtından Akseki mahallesinde sâkin olan ve Atebe-i aliyye-i sultâniyede vâki‘ yayabaşılara mahsûs odalardan yedincisinin odabaşısı olan fahrü’l-akrân Hasan Subaşı b. Ahmed meclis-i şer‘-i şerîfde -sâneha’llâhü te‘âlâ ani’t-tağyîr ve’t-tahrîf- hâzır olup, işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu, mahalle-i merkūmede vâki‘, bir tarafdan merhûme Sultan Hâtun Dârü’t-ta‘lîmi, diğer tarafdan Ali Beşe vakfı, öteki tarafdan Mehmed b. Bakkalzâde mülkü ve diğer tarafdan da tarîk-i âm ile mahdûd olan, altında ahır ve helâ bulunan fevkānî bir beyti, fevkānî iki beyti, tahtânî iki beyti, mutfağı, müşterek su kuyusunu, helâyı, avluyu eşcâr-ı müsmire ve gayr-ı müsmireli bahçeyi müştemil bulunan cemî‘-i menzilini cümle tevâbi‘ ve levâhıkıyla râyicü’l-vakt elli iki bin akçe semen-i mu‘ayyen-i makbûzla zevcesi hâfıza-i hâze’l-kitâb Belkıs Hâtun bt. Abdullah nâm hâtuna îcâb kabûlü ve teslîm tesellümü hâvî bey‘-i bât-ı sahîh ile bey‘ ettiğini ikrâr ve i‘tirâf etti. Müşteriye-i merkūme kıbelinden hasm-ı şer‘î câhid mahzarında ikrârı tasdîka vekâleti mahalle-i mezbûre imâmı Hüseyin Efendi b. Mehmed ve mahalle-i merkūme sükkânından Osman Çelebi b. Hamza er-Râcil nâm kimesnelerin şehâdetleri ile sâbit olan Seyyid Ömer b. Seyyid Hasan nâm kimesne vâki‘ ikrârı bi’l-vekâle vicâhen ve şifâhen tasdîk etti. Cerâ zâlike ve fî evâsıtı Rebî‘ilâhir sene selâse ve erba‘în ve elf. Şuhûdü’l-hâl: Es-Sâbikūn