Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 161 Hüküm no: 151 Orijinal metin no: [28b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sefere giden yayabaşı Hasan Subaşı b. Ahmed’in hanımında kalan eşyaları Mahmiye-i İstanbul’da Akseki mahallesi sâkinlerinden olup hâlâ beyne’r-râcilin yedinci yayabaşılara mahsûs odanın zâbiti olan fahrü’l-akrân Hasan Subaşı b. Ahmed nâm kimesne meclis-i şer‘-i şerîfde, hâlâ zevce-i menkûhası olan râfi‘atü’l-kitâb Belkıs Hâtun bt. Abdullah tarafından husûs-ı âti’l-beyâna tasdîka vekîl olup, hasm-ı câhid-i şer‘î mahzarında vech-i mu‘teber-i mer‘î üzre vekâleti sâbite olan Seyyid Ömer b. es-Seyyid Hasan nâm kimesne mahzarında ikrâr ve takrîr-i kelâm eyleyip inşâallâhü te‘âlâ ben hâlâ fermân olan sefer-i zafer-rehîn-i hümâyûna teveccüh ve azîmet üzre olmağın, silk-i mülkümde olan eşyâdan zevcem müvekkile-i mezbûre hâtun yedinde ancak bir mor çuka ferâce ve sansar kürkü kaplı bir siyah çuka ferâce ve bir mor çuka çakşır ve bir gümüşlü raht ve bir gümüşlü garâre ve bir sürh ve bir beyâzî velence ve bir yemeni yorgan ve iki yasdık ve bir orta Selânik keçesi ve bir köhne ipi olup eşyâ-i mezkûreden mâ‘adâ mezkûre Belkıs Hâtun yedinde ism-i mâl ıtlâk olunur bir şeyim yokdur dedikde, gıbbe’t-tasdîki’ş-şer‘î sûret-i hâl bi’t-taleb ketb olundu. Tahrîren fî evâsıtı Rebî‘ilâhir li sene selâsin ve erba‘în ve elf. Şuhûdü’l-hâl: Es-Sâbikūn el-mezbûrûn.