Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 169 Hüküm no: 164 Orijinal metin no: [30b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Süleyman Vakfı’na ait yanmış menzilin Aynî Hatun bt. Abdullah’a kiralandığı Mahmiye-i Kostantıniyye’de Manisa[lı] Çelebi mahallesi imâmı ve mahalle-i merkūmede vâki‘ merhûm Mehmed Çelebi b. Süleyman nâm sâhibü’l-hayrın vakfından olup âti’z-zikr olan bir bâb menzilin savb-ı şer‘den mansûb mütevellîsi olan Mustafa Halîfe b. Mehmed nâm kimesne ile vâkıf-ı merkūmun zevce-i metrûkesi zikr olunan menzilin meşrûtun-aleyhâsı olan Zamâne bt. Abdullah nâm hâtun meclis-i şer‘de, işbu hâfızatü’l-kitâb Aynî Hâtun bt. Abdullah mahzarında bi tav‘ihâ ikrâr ve takrîr-i kelâm edip merkūm-ı müşârunileyh Mehmed Çelebi mahalle-i merkūmede vâki‘ olup, bir beyt-i süflî ve bir beyt-i ulvî ve bir zulleyi ve kenîfi ve muhavvata-i yesîreyi müştemil olup bir tarafı Mehmed b. Ebülkasım mülkü ve iki tarafı Mi‘mâr Muslihiddin Vakfı ve bir tarafı tarîk-i âm ile mahdûd olan bir bâb mülk menzili hâl-i hayâtında hasbeten lillâh vakf ve habs edip süknâsını evvelâ kendi nefsine ba‘de vefâtihî zevcesi merkūme Zamâne Hâtun’a ve ba‘de vefâtihâ evlâdına ve evlâd-ı evlâd-ı evlâdına ve ba‘de’l-inkırâzi’l-evlâd îcâr olunup, ücret-i hâsılasından mahalle-i merkūme avârızı mühimmâtına senede yüz yirmi beşer akçe verile deyü şart edip vakfiye tahrîr olunmağın, zevce-i metrûkesi merkūme Zamâne Hâtun menzil-i merkūmda hasbemâ şarti’l-vâkıf sâkine iken bi irâdetillâhi te‘âlâ muhterik olup, hâsıl olan üç bin akçe kıymetli nakzı ile tecdîd ve imâret mümkün olmayıp vech-i meşrûh üzre tecdîde vakfın müsâ‘adesi olmamakla, merkūme Aynî Hâtun menzil-i merkūmun tecdîd ve imâretine kendi mâlından sarf eylediği meblağ taraf-ı vakıfda ücret-i mu‘accelesine mahsûb olmak üzre tecdîd ve imârete râgıbe olup istîzân eyledikde, minvâl-i muharrer üzre izin verilmek her vechile vakfa nâfi‘ olmağın, tevliyet-i mahkiyye ve meşrûtiyyet-i merkūmemiz hasebiyle mersûm[e] Aynî Hâtun menzil-i mezkûru minvâl-i muharrer üzre tecdîd ve imâret edip kendi mâlından sarf eylediği meblağ cânib-i vakıfda ücret-i mu‘accelesine mahsûb olduğu için müceddeden binâ ve imârete izin verip, menzil-i mesfûru zikirleri sebk eden üç bin akçe kıymetli nakzı ile merkūme Aynî Hâtun’a teslîm eyledik dediklerinde, mütevellî-i merkūm Mustafa Halîfe ile meşrûtun-aleyhâ olan mersûme Zamâne Hâtun’un nehc-i mastûr üzre sudûr eden kelimâtını mezbûre Aynî Hâtun dahi bi’l-muvâcehe tasdîk ve bi’l-müşâfehe tahkīk edicek mâ vaka‘a bi’t-taleb ketb olundu. Tahrîren fi’l-yevmi ( ) şehri Rebî‘ilâhir li sene [1]143. Şuhûdü’l-hâl: Mehmed Efendi b. Ahmed el-Müderris, Ahmed b. İbrahim el-Müezzin, Mustafa b. Mehmed, Hasan Çavuş b. Mahmud, Mehmed Çelebi b. Haydar, Mustafa Bey b. Abdullah, Behrâm Bey b. Abdullah, Ahmed b. Hüseyin.