Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 168 Hüküm no: 163 Orijinal metin no: [30b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Mehmed Beşe’nin babasından intikal eden çiftlik ve çayırları Hasan Beşe b. Mehmed’e sattığı Vilâyet-i Rumeli’nde Avlonya sancağında Tepedelen kazâsında Karaşa nâm karyede bundan akdem müteveffâ olan Mustafa b. Abdullah nâm kimesnenin sulbî oğulları olup, hâlâ mahmiye-i Kostantıniyye’de dergâh-ı âlî yeniçerileri odalarından yeni odalarda sekizinci ağa bölüğünün odabaşısı olan el-Hâc Mehmed Beşe nâm kimesne meclis-i şer‘de, li-ebeveyn kız kardeşi oğlu olan işbu bâ‘isü’l-kitâb Hasan Beşe b. Mehmed nâm râcil mahzarında bi tav‘ihî ikrâr ve takrîr-i kelâm edip, karye-i mezbûrede vâki‘ olup tahtânî ve fevkānî büyût-ı müte‘addideyi ve dört kıt‘a bağı ve bir kıt‘a mülk çayırın yüz kök eşcâr-ı kurûmu müştemil olup bundan akdem bi tarîki’l-irsi’ş-şer‘î babam müteveffâ-yı merkūmdan ve li-ebeveyn ammim olup ba‘dehû müteveffâ olan Mehmed Çavuş nâm kimesneden kezâlik bi tarîki’l-irsi’ş-şer‘î hasran bana intikāl etmekle, ahâlî-i diyâr beyninde ma‘rûf ve pür-iştihâr olup tahdîd ve tavsîfden müstağnî olan iki kıt‘alık çiftliği cümle tevâbi‘ ve levâhıkı ve kâffe-i menâfi‘ ve merâfıkı ile zikr olunan iki kıt‘a çiftliğin dâhilinde vâki‘ olup silk-i mülkümde olan altmış re’s koyun ve beş re’s ma‘lûmü’l-vasf sığır ve sâyir beynimizde ilm-i şer‘î ile ma‘lûm âlât-ı zirâ‘at ve erbâb-ı harâseti kız kardeşim oğlu mezbûr Hasan Beşe’ye safka-i vâhide ile otuz bin nakd-i râyic fi’l-vakt fiddî akçeye bey‘-i bât-ı sahîh-i şer‘î ile bey‘ eyledikde, mezbûr dahi vech-i meşrûh üzre iştirâ ve kabûl edip, semen-i merkūmu bi’t-tamâm ve’l-kemâl yedinden alıp kabz ve tesellüm eylediğinden sonra mebî‘ât-ı merkūmâtı mahallinde zabt ve kabz etmek için mezbûr Hasan Beşe’yi taslît eyledim. Min ba‘d karye-i merkūmede vâki‘ olup minvâl üzre babamdan ve ammimden intikāl eden ma‘lûmü’l-hudûd iki kıt‘a çiftliğin ve sâyir bağlar ve bahçe ve çayır dâhillerinde olan koyun ve sığır ve âlât-ı merkūme cemî‘an merkūmun mülk-i müşterâsı olup, benim [bir] vechile alâkam yokdur dedikde, merkūm el-Hâc Mehmed Beşe’nin vech-i meşrûh üzre sudûr eden i‘tirâfını mersûm Hasan Beşe dahi bi’l-muvâcehe tasdîk ve nehc-i muharrer üzre iştirâ ve kabûl eylediğini tahkīk edicek, mâ vaka‘a bi’t-taleb ketb olundu. Tahrîren fî evâsıtı Rebî‘ilâhir min şuhûri li sene selâsin ve erba‘în ve elf. Şuhûdü’l-hâl: İbrahim Beşe b. Abdullah er-Râcil, Ali Beşe b. Abdullah er-Râcil, el-Hâc Ömer Beşe b. Ali er-Râcil, Mehmed Beşe b. Abdülkerim vekîlü’l-harc, Haydar Beşe b. Murad er-Râcil, İsâ Beşe b. Ali er-Râcil, Hasan Beşe b. Murad er-Râcil, Piyâle Çavuş b. Abdullah, Mansur b. Hamza.