Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 171 Hüküm no: 166 Orijinal metin no: [31a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Matyoz v. Nikola’nın babasının terekesi davalarında vekil tayin edildiği Mahmiye-i İstanbul’da Abdi Subaşı mahallesi sâkinlerinden râfi‘ü’l-kitâb Matyoz v. Nikola nâm zimmîden mahfil-i kazâda, da‘vâ-yı sahîha ile mesbûk istişhâd-ı şer‘î sudûrundan sonra mahalle-i mezbûre sâkinlerinden Nikola v. Filota ve Sevasto v. Nakomi nâm zimmîler li ecli’ş-şehâde meclis-i şer‘e hâzırân olup, gıbbe’l-istişhâdi’ş-şer‘î fi’l-hakīka mukaddemâ mahalle-i mezbûrede [Nikola] hâlik olup, verâseti zevcesi Tırandafilo bt. Agusti’ye ve sulbî kebîr oğlu mezbûr Matyoz’a ve sulbiye kebîre kızı Tırandafilo Velisar[’a münhasıra olup], hâlik-i mezbûrun terekesinden kendilere âyid olan hisse-i şer‘iyyelerin tereke-i mezbûreye vâzı‘u’l-yed olanlardan da‘vâ ve taleb ve ahz u kabza ve kendilere îsâl ve iktizâ ederse hukkâm-ı kirâm huzûrunda mürâfa‘a ve muhâsamaya müdde‘î-i mezbûr Matyoz’u bizim huzûrumuzda müvekkil ve nâib-i menâb nasb eylediler, ol dahi vekâlet-i mezbûreyi kabûl ve hizmet-i lâzımesin edâya müte‘ahhid ve iltizâm eyledi. Biz bu husûsa bu vech üzre şâhidleriz şehâdet dahi ederiz deyip istişhâd-ı şer‘iyye eylediklerinde, ba‘de ri‘âyeti şerâiti’l-kabûl şehâdetleri makbûle olmağın, mâ hüve’l-vâki‘ bi’t-taleb ketb olundu. Tahrîren fî evâsıtı Rebî‘ulâhir li sene selâsin ve erba‘în ve elf. Şuhûdü’l-hâl: Es-Sâbikūn mezbûrûn.