Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 171 Hüküm no: 167 Orijinal metin no: [31a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Paşa b. Mehmed’in borcunu zamanında ödemeyle rehin verdiği gayrimenkullerini satması için Yusuf Bey b. Mehmed’i vekil tayin ettiği Mahmiye-i İstanbul’da Yedikule kurbunda Bucakbağı demekle ma‘rûf mahallede sâkin sâbıkan Trabzon Beylerbeyisi olan emîrü’l-ümerâ’i’l-kirâm kebîrü’l-küberâ’i’l-fihâm Mehmed Paşa b. Mehmed nâm kimesne meclis-i şer‘-i şerîf-i şâmihü’l-imâdda, mahmiye-i mezbûrede Horhor mahallesi sâkinlerinden râfi‘ü’l-kitâb mefharü’l-akrân Mehmed Bey b. Yahya el-Yesârî mahzarında ikrâr ve takrîr-i kelâm eyleyip, mezkûr Mehmed Bey’in hâlâ zimmetinde bin aded riyâlî guruş karz-ı şer‘îden ve bin beş yüz aded riyâlî guruş beynimizde envâ‘ ve eczâsı ma‘lûme müşriye? ve makbûze olan emti‘a-i mütenevvi‘a esmânından cem‘an iki bin beş yüz aded riyâlî guruş hakkı olup, meblağ-ı mezbûrun cümlesi mukābelesinde silk-i mülk-i sahîhimde olan eşyâdan Havâss-ı Aliyye kazâsına tâbi‘ Terkos nâhiyesinde Boyalık nâm karyede vâki‘ bir tarafı Beyoğlu çiftliği ve bir tarafı mer‘â ve iki tarafı arz-ı hâliye ile mahdûd dâhiliye ve hâriciye fevkānî ve tahtânî büyût-ı müte‘addide ve mutfak ve fırın ve anbar ve zât-ı eşcâr-ı müsmire hadîka ve bağı müştemil olan çiftliği ve karye-i mezbûrede vâki‘ bir tarafı Yusuf b. Abdullah mülkü ve bir tarafı Hüsrev b. Abdullah mülkü ve bir tarafı vâdi ve bir tarafı tarîk-i âm ile mahdûd büyût-ı müte‘addide ve fırın ve cüneyne ve bağı müştemil olan menzili ve mahmiye-i mezbûrede Süleyman Ağa mahallesinde vâki‘ bir tarafı Hasan Ağa mülkü ve bir tarafı mescid duvarı ve bir tarafı ba‘zan yine mezkûr Süleyman ve ba‘zan Mehmed Ağa mülkleri ve bir tarafı tarîk-i âm ile mahdûd büyût-ı müte‘addide ve su kuyusu ve arsa-i hâliye[yi] müştemil olan menzili ve mahmiye-i mezbûrede Sipâhi pazarında ve Kuyumcular sûkunda vâki‘ lede’l-ahâlî ma‘lûmü’l-hudûd olan iki bâb dükkânlar cümle tevâbi‘ ve levâhıkıyla mesfûr Mehmed Bey yedinde rehn-i makbûzdur deyip, gıbbe’t-tasdîki’ş-şer‘î mûmâ-ileyh Mehmed Paşa i‘âde-i kelâm eyleyip, deyn-i mezkûrdan mâ‘adâsı karz olan bin beş yüz guruş târih-i kitâbdan bir sene tamâmına değin mesfûr Mehmed Bey’e edâya kudretim olmaz ise zikr olunan iki bâb dükkânlarım vefâ etmezse sâyir rehinleri semen-i misilleriyle bey‘-i bât ile bey‘a ve esmânından deyn-i mezkûru mezbûr Mehmed Bey’e edâya ve ziyâdesini kendiye îsâle hâzır bi’l-meclis olan Yusuf Bey b. Mehmed nâm kimesneyi azlden masûn vekâlet-i devriye ile tevkîl ve nâib-i menâb nasb ve ta‘yîn eyleyip, ol dahi vekâlet-i mastûreyi kabûl ve hizmet-i lâzımesini edâya müte‘ahhid ve iltizâm etmeğin, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sânî aşer min [şehri] Rebî‘ilâhir li sene selâsin ve erba‘în ve elf. Şuhûdü’l-hâl: Mehmed Bey b. Mustafa, Habib Çelebi b. Mehmed, Hasan Bey b. Abdullah, Mustafa b. Kasım, Piyâle Bey b. Abdullah, Ahmed Çelebi b. İsmail, Mehmed Bey b. Ahmed.