Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 175 Hüküm no: 172 Orijinal metin no: [32a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yasef v. İsak’ın mülk menzilini zevcesi Avro bt. Yasef’e sattığı Mahmiye-i Kostantıniyye’de Yahudiler mahallâtından Alacahamam mahallesinde sâkin olup Alman cemâ‘atinden olan Yasef v. İsak nâm Yahudi meclis-i şer‘de, zevcesi işbu hâmiletü’l-kitâb Avro bt. Yasef nâm yahudinin kardeşi ve ikrâr-ı âti’z-zikri tasdîka nâibü’l-vekâle vekîli olan Nesimî v. Yasef nâm Yahudi muvâcehesinde bi tav‘ihî ikrâr ve takrîr-i kelâm edip, mahalle-i merkūmede vâki‘ tahtânî ve fevkānî iki beyti ve hâricinde bir kasab dükkânını müştemil olup, bir tarafı Çelebi oğlu Vakfı ve iki tarafı Ebussuûdzâde Efendi Vakfı ve bir tarafı tarîk-i âm ile mahdûd olan bir bâb mülk menzili, bundan akdem cümle-i hudûd ve kâffe-i hukūku ile zevcem müvekkile-i merkūme Avro’ya yüz on beş bin nakd-i râyic fi’l-vakt fiddî akçeye bey‘-i kat‘î ile bey‘ edip kabz-ı semen ve teslîm-i mebî‘ eyledim, elân menzil-i merkūm zevcem müvekkilem mersûmenin mülk-i müşterâsı olup, benim bir vechile alâkam yokdur dedikde, mukırr-ı merkūm Yasef’i kelimât-ı meşrûhasında merkūm Nesimî dahi bi’l-vekâle tasdîk ve minvâl-i muharrer üzre iştirâ ve def‘-i semeni tahkīk edicek, mâ vaka‘a bi’t-taleb ketb olundu. Tahrîren fî gurreti şehri Rebî‘ilâhir min şuhûri li sene selâsin ve erba‘în ve elf. Şuhûdü’l-hâl: Mehmed Bey b. Yusuf er-Râcil, Mahmud Bey b. Yusuf, Yusuf b. Abdullah er-Râcil, Abdurrahman Çelebi b. Yusuf er-Râcil, Mansur b. Hamza.