Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 176 Hüküm no: 174 Orijinal metin no: [32b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Hoca b. Abdi’nin ortağı Zafir v. Nikola’ya olan borçlarını ikrar ettiği Mahmiye-i Galata’da Azebkapısı kurbunda sâkin Mustafa Hoca b. Abdi nâm kimesne meclis-i şer‘-i şerîfde, şerîki olan râfi‘ü’l-kitâb Zafir v. Nikola nâm zimmî mahzarında ikrâr-ı kelâm eyleyip, mukaddemâ mezkûr Zafir ve altı nefer kimesne ile iştirâk üzre Hasan Efendi nâm kimesneden bi tarîki’l-mudârabe seksen dört bin beş yüz akçe alıp i‘mâl eylediğimizde hâsıl olan rıbh ve nemâdan mezkûr Zafir’e altı bin altı yüz akçe isâbet eyleyip, meblağ-ı mezbûr benim yedimdedir mezkûr Zafir’e edâ ve îfâya ederin ve re’s-i mâl-ı mezkûrdan otuz üç bin beş yüz akçe zimmetim nâsda olup, ânın dahi yerlerin gösterip beyân edeyin dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fî evâsıtı Rebî‘ulâhir min şuhûri li sene selâsin ve erba‘în ve elf. Şuhûdü’l-hâl: İskender b. Şaban, Mehmed b. Ahmed, Ali b. Abdullah, Sinan b. Abdullah.