Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 184 Hüküm no: 184 Orijinal metin no: [34b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Yusuf’un kayığına Dimitri v. Yani’nin kasten çatmadığına yemin ettiği Mahmiye-i İstanbul’da Samatyakapısı kurbunda ( ) mahallesinde sâkin Mehmed Bey b. Yusuf nâm kimesne râfi‘ü’l-kitâb Dimitri v. Yani nâm zimmîyi meclis-i şer‘e ihzâr ve üzerine da‘vâ edip, bundan mukaddem yirmi bin akçe kıymetli mülk kayığım ile Akdeniz’de Hora nâm karyede mahmiye-i mezbûreye gelirken Büyükçekmece kurbunda Bababurnu demekle ma‘rûf mevzi‘de deryâ üzerinde mezbûr Dimitri nısfü’l-leylde kayığı ile üzerime geldikde, ben mezbûru âgâh edip ve kayığını def‘ ve zabt mümkün iken kasd ile benim kayığımı çiğnedüp gark etmişdir, suâl olunup bi hasebi’ş-şer‘i’ş-şerîf zikr olunan kayığımın kıymeti olan meblağ-ı mezbûr tazmîn olunmak matlûbumdur dedikde, gıbbe’s-suâl mesfûr Dimitri cevâbında, ben deryâ üzerinde giderken leyle-i muzlim olmağın ale’l-gafle bi gayri kasdin kayığım mezbûrun kayığına birbirimizi görmeden çatdıkda mezbûrun kayığı yüklü olmakla gark olmuşdur deyü kendi sun‘ı ile kasden çatdığını münkir olmağın, müdde‘î-i mersûmdan da‘vâsına muvâfık beyyine taleb olundukda beyyineden aczine i‘tirâf ve istihlâf etmeğin, mezkûr Dimitri’ye mukaddemâ merkūm Mehmed Reis deryâya kayık ile gelirken kendiyi âgâh ettikden sonra kendi fi‘il ve sun‘ıyla kasden çatmadığına yemîn teklîf olunup, ol dahi alâ vefki’l-mes’ûl yemîn billâhi’llezî enzele’l-İncîle alâ İsâ -aleyhi’s-selâm- etmeğin, mâ hüve’l-vâki‘ bi’t-taleb ketb olundu. Tahrîren fî evâhiri Rebî‘ilâhir li sene selâsin ve erba‘în ve elf. Şuhûdü’l-hâl: Hüseyin b. Abdullah, Hasan Beşe b. ( ) seroda, Yunus b. ( ), Ali Çelebi b. Osman.