Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 185 Hüküm no: 185 Orijinal metin no: [35a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hızır b. İlyas’ın Mosi v. Nesimi’den alacak davasının reddi Vilâyet-i Anadolu’da Kastamonu kazâsına tâbi‘ ( ) nâm karye ahâlîsinden Hızır b. İlyas nâm kimesne mahfil-i kazâda, mahmiye-i İstanbul’da sâkin olan Kedüs cemâ‘atinden râfi‘ü’l-kitâb Mosi v. Nesimî nâm Yahudi mahzarında üzerine da‘vâ eyleyip, mukaddemâ her bir sikke altını iki esedî guruş ile on akçeye sarf edivermek üzre mâl-ı hâlisimden mezkûr Yahudi’ye on bir aded sikke altın def‘ ve teslîm etmiş idim. Hâlâ taleb ederim suâl olunsun deyip gıbbe’s-suâl Yahudi-i mesfûr cevâba tasaddî edip, merkūm Hızır bundan mukaddem vech-i meşrûh üzre bir def‘a dahi benden on bir sikke altın taleb eyleyip ba‘de’l-inkâr tavassut-ı müslimîn ile beynimizde musâlaha-i şer‘iyye vâki‘ olup, zikr olunan on bir sikke altın da‘vâsından bin akçe üzerine beni sulh eylediklerinde, mezkûr Hızır dahi sulh-ı mezbûru kabûl ve berây-ı sulh olan meblağ-ı mezbûr bin akçeyi yedinden alıp kabz edip, husûs-ı mezkûra müte‘allik cemî‘-i talebden zimemim ibrâ eylemişdir deyip gıbbe’l-istintâk ve’l-inkâr Yahudi-yi mesfûrdan sıdk-ı makāline beyyine taleb olundukda, sikāt-ı müslimînden Mehmed b. Yahya ve diğer Mehmed b. Ali nâm kimesneler li ecli’ş-şehâde meclis-i şer‘e hâzırân olup bi hasebi’l-istişhâdi’ş-şer‘î, fi’l-vâki‘ mezkûr Hızır mukaddemâ Yahudî-yi mesfûrdan on bir sikke altın taleb eyledikde ba‘de’l-inkâr beynlerinde musâlaha-i şer‘iyye vâki‘ olup, meblağ-ı mezbûr on sikke altını bin akçe üzerine bizim huzûrumuzda sulh eylediklerinde sulh-ı mezbûru mezkûr Hızır kabûl edip ve bedel-i sulh olan meblağ-ı mezbûru yedinden alıp kabz edip husûs-ı mezbûra müte‘allik da‘vâ ve talebden zimmetini ibrâ-i küllî ile ibrâ eyledi. Biz bu husûsa bu vech üzre şâhidleriz şehâdet dahi ederiz deyip edâ-i şehâdet-i şer‘iyye eylediklerinde, ba‘de’t-ta‘dîli’ş-şer‘î şehâdetleri makbûle olmağın, mezkûr Hızır da‘vâ-yı mezkûresinden men‘ olunup, mâ hüve’l-vâki‘ bi’t-taleb ketb olundu. Tahrîren fî evâsıtı Rebî‘ilâhir li sene selâsin ve erba‘în ve elf. Şuhûdü’l-hâl: Resûl Efendi b. Abdurrahman, Süleyman Bey b. ( ) , Ömer b. ( ), Ahmed b. Ali.