Bab Mahkemesi 54 Numaralı Sicil (H. 1102 / M. 1691) cilt: 20, sayfa: 215 Hüküm no: 245 Orijinal metin no: [40a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mehmed Efendi’nin Mehmed Çelebi b. İbrahim Çavuş’un varisi olduğunu ispatlayarak terekesini alması Mahmiye-i İstanbul’da Molla Güranî mahallesi sâkinelerinden olup zikri âtî şâhidler şehâdetleriyle mu‘arrefe olan Ayşe bt. Mehmed Efendi b. diğer Mehmed Çelebi b. Sinan nâm hâtun meclis-i şer‘-i şerîfde, vilâyet-i Rumeli’nde İnoz ve Kavak memlehası mukāta‘asının emîni olup, zikri câ’î terekeye bi’l-emâne vâzı‘u’l-yed olan Sâlih Ağa b. Mehmed tarafından husûs-ı âti’l-beyâna vekîl olduğu Abdülfettah Ağa b. Ramazan ve Ali Çelebi b. Hasan şehâdetleriyle şer‘an sâbit olan Mustafa Çelebi b. Veli nâm kimesne mahzarında üzerine da‘vâ ve takrîr-i kelâm edip, vilâyet-i mezbûrede nefs-i Keşan kasabasında mütemekkin iken bundan akdem bilâ-veled vefât edip terekesi emîn-i mezbûr Sâlih Ağa yedinde bi’l-emâne mazbût olan Mehmed Çelebi b. İbrahim Çavuş b. Sinan nâm müteveffânın babası merkūm İbrahim Çavuş ile benim babam merkūm Mehmed Efendi’nin babası merkūm diğer Mehmed Çelebi li ebeveyn karındaşlardır, mezbûrân İbrahim Çavuş ve diğer Mehmed Çelebi’nin babaları ismi merkūm Sinan’dır, vâlideleri ismi Emetullah bt. Abdurrahman’dır ve dedeleri ismi Abdurrahim’dir ve maskat-ı re’sleri mahalle-i mezbûredir, hâlâ ben müteveffâ-yı mezbûrun ber vech-i muharrer ammi olan mezbûr diğer Mehmed Çelebi’nin sulbî oğlu mezbûr Mehmed Efendi’nin sulbiye kızı olmağla, müteveffâ-yı mezbûrun zî-rahm cihetinden hasran vârisesi olmağın, müteveffâ-yı mezbûrun ber vech-i muharrer verâseti bana münhasıra iken emîn-i mezbûr Sâlih Ağa beytülmâle âid olmak zu‘muyla tereke-i mezbûreye vaz‘-ı yed eder, suâl olunup tereke-i mezbûreyi bana teslîme tenbîh olunmak matlûbumdur dedikde, gıbbe’s-suâl vekîl-i mezbûr Mustafa Çelebi cevâbında, müteveffâ-yı mezbûr Mehmed Çelebi’nin defter-i kassâm mûcebince on yedi bin altı yüz akçe terekesine ber vech-i muharrer emîn-i mezbûrun vaz‘-ı yedini ikrâr, lâkin müdde‘iye-i mezbûrenin ber vech-i muharrer verâsetini inkâr edicek, mezbûreden ber vech-i meşrûh verâsetine beyyine taleb olundukda, Kazasker Mehmed Efendi mahallesinden Abdullah Çelebi b. Mehmed ile Havâss-ı Aliyye kazâsına tâbi‘ Hadımyaylası nâm karyeden Ahmed Beşe b. Mehmed nâm kimesneler li ecli’ş-şehâde meclis-i şer‘a hâzırân olup isre’l-istişhâd, fi’l-hakīka vilâyet-i mezbûrede nefs-i Keşan kasabasında mütemekkin iken bilâ-veled vefât edip terekesi emîn-i mezbûr Sâlih Ağa yedinde bi’l-emâne mazbût olan Mehmed Çelebi b. İbrahim Çavuş b. Sinan nâm müteveffânın babası merkūm İbrahim Çavuş ile müdde‘iye-i mezbûre Ayşe Hâtun’un babası mezbûr Mehmed Efendi’nin babası mezbûr diğer Mehmed Çelebi li ebeveyn karındaşlardır, mezbûrân İbrahim Çavuş ve diğer Mehmed Çelebi’nin babaları ismi mezbûr Sinan’dır ve vâlideleri ismi Emetullah bt. Abdurrahman’dır ve dedeleri ismi Abdurrahim’dir ve maskat-ı re’sleri mahalle-i mezbûredir, hâlâ müdde‘iye-i mezbûre Ayşe Hâtun müteveffâ-yı mezbûrun ber vech-i muharrer ammi olan mezbûr diğer Mehmed Çelebi’nin sulbî oğlu merkūm Mehmed Efendi’nin sulbiye kızı olmağla müteveffâ-yı mezbûrun zî-rahm cihetinden hasran vârisesidir, müteveffâ-yı mezbûrun verâseti müdde‘iye-i mezbûre Ayşe Hâtun’a münhasıradır, gayrı vârisi ve terekesine müstehıkk-ı âhar olduğu ma‘lûmumuz değildir. Hâlâ müdde‘iye-i mezbûre için tereke-i müteveffâ-yı mezbûru vâzı‘u’l-yed olan emîn-i mezbûrdan ve gayrıdan taleb ve ahz [hakkı] vardır, biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye eylediklerinde, ba‘de’t-ta‘dîl ve’t-tezkiye şehâdetleri makbûle olmağın, mûcebince müdde‘iye-i mezbûre Ayşe’nin ber vech-i muharrer verâsetine ba‘de’l-hükmi’ş-şer‘î tereke-i mezbûreden emîn-i mezbûrun kabzını i‘tirâf eylediği on yedi bin altı yüz akçeyi müdde‘iye-i mezbûreye edâ ve teslîme vekîl-i mezbûr Mustafa Çelebi’ye tenbîh olundukdan sonra mezbûre Ayşe Hâtun i‘âde-i kelâm edip, meclis-i şer‘de vekîl-i merkūm mahzarında ikrâr ve takrîr-i kelâm eylediği ânifen edâsına tenbîh olunan meblağ-ı mezbûr on yedi bin altı yüz akçeyi emîn-i mezbûr Sâlih Ağa yedinden bi’t-tamâm ahz u kabz edip, min ba‘d tereke-i mezbûreye müte‘allika âmme-i da‘vâdan emîn-i mezbûr Sâlih Ağa’nın zimmetini ibrâ ve iskāt eyledim dedikde, gıbbe’t-tasdîki’ş-şer‘î, mâ vaka‘a bi’t-taleb ketb olundu. Fi’l-yevmi’t-tâsi‘ min Cumâdelâhire sene 1102. Şuhûdü’l-hâl: Mustafa Efendi b. Süleyman, Mustafa Efendi b. Mehmed, Receb Bey b. Osman, İsmail Çelebi b. Osman, Mehmed Çelebi b. Halil, Mehmed b. Abdullah, Ali Çelebi b. Hasan, Hasan Bey el-bostanî, İbrahim Çelebi b. Ahmed, diğer İbrahim Çelebi.