Bab Mahkemesi 54 Numaralı Sicil (H. 1102 / M. 1691) cilt: 20, sayfa: 217 Hüküm no: 246 Orijinal metin no: [40a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Edirne’de ekmekçi olan Miho v. Kosta’nın evini Ergiri v. Üskübi’ye satması Havâss-ı Aliyye kazâsına tâbi‘ Ayapa nâm karyeden olup mahrûse-i Edirne’de hâs ekmekçi olan Miho v. Kosta v. Yorgi tarafından husûs-ı âti’l-beyâna vekîl olup Halil Çelebi b. Abdullah ve Nikola v. Yorgaki şehâdetleriyle şer‘an vekâleti sâbite olan Dimitri v. Yani meclis-i şer‘-i şerîf-i enverde, işbu bâ‘isü’l-kitâb Ergiri v. Üskübi nâm zimmî muvâcehesinde ikrâr ve i‘tirâf edip, müvekkilim mezbûr Miho karye-i mezbûrede vâki‘ bir tarafı Rus oğlu Yorgi mülkü ve etrâf-ı selâsesi tarîk-i âm ile mahdûd fevkānî iki bâb oda ve önünde sundurma ve havluyu müştemil mülk menzilini bey‘ ve semeninden Davudpaşa bahçesi bostancıları mühimmâtına mevkūfe nukūda mütevellî olan işbu hâzır bi’l-meclis Mustafa Bey b. Ahmed ba‘de külli’l-hesâb yedi buçuk guruş deyni olmağla edâya ve fazla kalanı kendiye îsâle beni vekîl etmekle, ben dahi ba‘de kabûli’l-vekâle menzil-i mezbûru bi cümleti’t-tevâbi‘ ve’l-levâhık mezbûr Ergiri’ye üç bin üç yüz seksen akçeye bey‘ ve teslîm, ol dahi iştirâ ve kabz ve kabûl eyledikden sonra semeni olan meblağ-ı mezbûr üç bin [üç] yüz seksen akçeyi yedinden alıp kabz ve yedi buçuk guruşu mütevellî-i mezbûra edâ ve teslîm, ol dahi ahz u kabz ve tesellüm eyledi. Ba‘de’l-yevm menzil-i mezbûr mülk-i müşterâsıdır, keyfe mâ yeşâ mutasarrıf olsun dedikde, gıbbe’t-tasdîki’ş-şer‘î, mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min Cumâdelâhire sene 1102. [40b] Şuhûdü’l-hâl: Mustafa Bey bostanî, Ahmed Bey b. Mehmed, Abdülkādir Efendi b. Mustafa, İbrahim Çelebi b. Ahmed, Hristo v. Kazir, Hristo v. Yorgi.