Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 201 Hüküm no: 206 Orijinal metin no: [39b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musa v. Kamal adlı yahudinin Mustafa b. Hocayurd’da çuka bedelinden alacağı olduğu Mahrûse-i Bursa kadısı kıdvetü’l-ulemâi’l-kirâm Mahmud Efendi b. Ahmed tarafından verilmiş, ünvânıyla mu‘anven, mührüyle memhûr, zeyilde mezkûr senenin evâhir-i Safer-i muzafferi târihiyle müverrah, mazmûnunda, mahrûse-i merkūme mahallâtından İncepençe? mahallesi sükkânından Seyyid Mehmed Çelebi b. Ali b. Abdülkerim ve yine mahrûse-i merkūme tekkesinden Mustafa b. Ali b. Abdullah nâm kimesneler, mahrûse-i merkūme mahallâtından Kuruçeşme mahallesi sükkânından Musa v. Kamal nâm yahudiden sâdır olan da‘vâ-i sahîha-i şer‘iyyede gıbbe’l-istişhâd şöyle şehâdet ettiler ki, müdde‘î-i mezbûrun, mahrûse-i merkūme mahallâtından Gufranlık mahallesinde sâkin olup elân mahmiye-i Kostantıniyye’de yaşadığı mesmû‘ olan Mustafa b. Hocayurd’un zimmetinde vasfı ve nev‘i aralarında ma‘lûm, müşterâ-i makbûz çuka bahâsından lâzımü’l-edâ ve vâcibü’l-kazâ yüz altmış beş kıt‘a riyâlî kuruş hakkı vardır. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcibince hükmedildi. Kadı-i mezbûrdan verilen işbu hüccet-i mezbûre vârid olduğunda, medyûn-i mezbûr Mustafa meclis-i şer‘a ihzâr edilip hüccet-i şer‘iyye yüzüne okundu. Müdde‘â aleyh-i mezbûr tarafından hüccet-i merkūmenin vürûdu inkâr olunduğunda, isimleri zeyl-i kitâbda muharrer şuhûd-ı tarîkden Mevlânâ Mahmud b. Hamza ve Ali b. Nazar, hüccet-i mezbûrenin kādı-i mezkûrdan sâdır olduğuna, üzerindeki hattın onun hattı olduğuna, üzerindeki mührün onun mührü olduğuna şehâdet ettiklerinde, şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcibince hükmedildi. Cerâ zâlike ve hurrire fî evâsıtı Rebî‘ilevvel sene selâse ve erba‘în ve elf. Şuhûdü’l-hâl: Yusuf Bey b. Şaban, Hüseyin b. Ahmed, Veli Ağa b. Mustafa, Mansur b. Hamza