Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 202 Hüküm no: 207 Orijinal metin no: [39b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nüzül Emini İbrahim Efendi’nin bedel-i nüzülden hazineye borcunun kalmadığı Atebe-i aliyye ve südde-i seniyyede hâlâ şıkk-ı evvel defterdârı olan umdetü’l-emâcid ve’l-ekârim kıdvetü erbâbi’l-mehâmid ve’l-mekârim zü’l-kadri’r-refî‘ ve’l-mecdi’l-menî‘ İbrahim Efendi tarafından husûs-ı âti’l-beyânı ikrâra sâbitü’l-vekâle vekîl olup, elân Başbâkīkulu olan fahrü’l-emâcid ve’l-a‘yân Ahmed Ağa b. ( ) nâm kimesne meclis-i şer‘-i hatîr-i lâzımü’t-tevkīrde, sipâh-ı zafer-penâh zümresinden olup bundan akdem bin kırk senesine mahsûb olmak üzre vilâyet-i Anadolu’ya livâ-i Hüdâvendigâr’da vâki‘ olan re‘âyânın nüzullerin cem‘e me’mûr olan işbu bâ‘isü’l-kitâb zahrü’l-akrân Mehmed Ağa b. Ahmed mahzarında bi’l-vekâle ikrâr ve takrîr-i kelâm edip, livâ-i merkūm re‘âyâsının bedel-i nüzullerin cem‘ edenler bir senede Hazîne-i Âmireye on dört yük seksen bin iki yüz akçe teslîm ettikleri muhâsebât-ı kadîme defterlerinde mastûr olmakla, mezbûr Mehmed Ağa dahi sene-i merkūmenin bedel-i nüzulü için on üç yük altmış üç bin akçeyi sâbıkan defterdâr olan merhûm Mustafa Paşa zamânında dâhil-i hazîne edip ve yüz on bir bin sekiz yüz akçe dahi müşârunileyh İbrahim Efendi zamânında teslîm edip ve beş bin akçe dahi ba‘zı mesârif-i mühimmeye sarf etmekle, muhâsebât-ı kadîme muktezâsınca mezbûr Mehmed Ağa zimmetinde sene-i merkūmenin bedel-i nüzulü akçesinden zimmetinde bir akçe bâkī kalmamışdır dedikde, mukırr-ı mûmâ-ileyh Ahmed Ağa’nın bi’l-vekâle sudûr eden i‘tirâfını mezbûr Mehmed Ağa dahi bi’l-muvâcehe tasdîk ve bi’l-müşâfehe tahkīk edicek, mâ vaka‘a bi’t-taleb ketb olundu. Tahrîren fî evâsıtı Rebî‘ilevvel min şuhûri [sene] selâsin ve erba‘în ve elf. Şuhûdü’l-hâl: Yusuf Ağa b. Abdullah, İbrahim Çelebi el-Cündî, Yusuf Bey b. Şaban, İbrahim Çelebi el-Kâtib, Ahmed Çavuş b. Mustafa.