Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 206 Hüküm no: 211 Orijinal metin no: [40b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine Hatun bt. Veli Reis’in miras ev hissesini kızkardeşi Saliha Hatun’a sattığı Mahmiye-i Galata’da Şehsuvar mahallesinde bundan akdem müteveffât olan Aişe bt. Receb Reis nâm hâtunun verâseti, sadriye kızları Saliha ve Emine ve Ümmühâni benât-ı Veli Reis hâtunlara münhasıra olmakla, muhallefâtı farzan ve redden ale’s-seviyye beynlerinde üç sehim i‘tibâr olunup, her birine bir sehim isâbet eylediği zâhir ve müte‘ayyin oldukdan sonra merkūme Emine Hâtun meclis-i şer‘-i hatîr-i lâzımü’t-tevkīrde, kızkarındaşı işbu bâ‘isü’l-kitâb merkūme Saliha Hâtun mahzarında bi tav‘ihâ ikrâr ve takrîr-i kelâm edip, mahalle-i merkūmede vâki‘ olup bir fevkānî ve bir tahtânî iki beyti müştemil olup bir tarafı Mehmed Reis mülkü ve bir tarafı Hümâ Hâtun Vakfı ve bir tarafı tarîk-i hâs ve bir tarafı tarîk-i âm ile mahdûd olup, vâlidemiz müteveffât-ı merkūme Aişe Hâtun’un muhallefâtından bi tarîki’l-irsi’ş-şer‘î cümlemize intikāl eden bir bâb menzilden vech-i meşrûh üzre üç sehimde bana isâbet eden bir sehim hisse-i şâyi‘amı, cümle tevâbi‘ ve levâhıkı ile kız karındaşım merkūme Saliha Hâtun’a beş bin nakd-i râyic fi’l-vakt fıddî akçeye bey‘-i kat‘î ile bey‘ ve teslîm eylediğimde, merkūme dahi minvâl-i muharrer üzre iştirâ ve kabûl eyledikden sonra semen-i merkūmu bi’t-tamâm ve’l-kemâl yedinden alıp kabz eyledim. Min ba‘d menzil-i merkūmun üç sehimde iki sehimi irsen ve şirâen kız karındaşım merkūme Saliha Hâtun’un mülk-i mahzıdır, keyfe mâ teşâ ve tahtâr mutasarrıfe olsun dedikde, mukırra-i merkūme Emine Hâtun’u ikrâr-ı meşrûhunda mezbûre Saliha Hâtun dahi bi’l-muvâcehe tasdîk ve vech-i mastûr üzre iştirâ ve kabûl eylediğini tahkīk edicek, mâ vaka‘a bi’t-taleb ketb olundu. Tahrîren fî evâsıtı Rebî‘ilevvel min şuhûri sene selâsin ve erba‘în ve elf. Şuhûdü’l-hâl: Şaban Efendi b. Mehmed el-kadı, Ali Efendi b. ( ) el-İmâm, el-Hâc Perviz b. Abdullah, el-Hâc Ali b. Kasım, Kabil b. Abdullah, Memi b. Abdullah, Mehmed Reis b. Behrâm, Yusuf Bey b. Abdullah.