Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 207 Hüküm no: 213 Orijinal metin no: [41a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Abdullah’ın Anbersima bt. Abdullah’a borcu olduğu Mahmiye-i İstanbul’da ( ) mahallesi sâkinelerinden Anbersima bt. Abdullah nâm hâtun meclis-i şer‘-i şerîfde, Mehmed Ağa b. Abdullah mahzarında üzerine takrîr-i da‘vâ ve tasdîr-i müdde‘â edip, bundan akdem mezbûr Mehmed Ağa’ya silk-i mülkümde münselik olan işbu hâzıra bi’l-meclis Vildan bt. Abdullah nâm câriyeyi tarafeynden îcâb ve kabûlü hâvî bey‘-i bât-ı sahîh-i şer‘î ile kırk bin nakd-i râyic fi’l-vakt akçeye bey‘ edip, ol dahi iştirâ ve tesellüm eyledikden sonra semeni olan meblağ-ı mezbûrun beş bin mezbûru’n-na‘t akçesini mezbûr Mehmed Ağa yedinden alıp otuz beş bin akçesi hâlâ zimmetinde kalmağın, hâlâ taleb eyledikde vermekde ta‘allül eder, suâl olunup alıverilmek matlûbumdur dedikde, gıbbe’s-suâl mezbûr Mehmed Ağa cevâbında, fi’l-hakīka müdde‘iyye-i merkūmeden iştirâ ve tesellüm eylediğim câriye-i mezkûre bahâsından mezbûre Anbersima’ya zimmetimde otuz beş bin mezbûru’n-na‘t akçe deynim vardır deyü bi’t-tav‘i’s-sâf ikrâr ve i‘tirâf etmeğin, edâsıyla ilzâm olunup mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ min şehri Rebî‘ilevvel li sene selâsin ve erba‘în ve elf. Şuhûdü’l-hâl: Ahmed Çavuş b. Abdullah, Mehmed Halîfe b. Kurd, Ali b. Hasan, Mehmed b. Ali.