Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 208 Hüküm no: 214 Orijinal metin no: [41a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Binası yanmış olan vakıf arsa üzerinde tekrar bina yapması için Osman Efendi b. Yusuf’a izin verildiği Ashâb-ı hayrât-ı hisân ve erbâb-ı meberrât-ı ihsândan ( ) nâm sâhibü’l-hayr vakf edip, her kimin tasarrufunda olursa ulemâ-i Nakşibendiye’ye beher sene üç yüz akçe mukāta‘a vere deyü şart eylediği mahmiye-i İstanbul’da Pirinççi Sinan mahallesinde vâki‘ bir tarafı mahalle-i mersûme mescidi imâmına meşrût menzil ve bir tarafı merhûm Ahizâde Efendi Vakfı’na ve iki tarafı tarîk-i âm ile mahdûde arsa-i merkūme üzerinde mebnî olan binâ-i memlûk muhterik olup arsa-i hâliye kalmağın, arsa-i mahdûde-i mezkûre yine binâ-i muhterik-i mezkûrun mâliki ve arsa-i mezkûrenin mutasarrıfı olan fahr-i kuzâtü’l-İslâm zahr-ı vülâti’l-enâm Osman Efendi b. Yusuf’a kendi dahi ulemâ-i Nakşibendiye’den olmakla mukāta‘a-i mezkûre ile ma‘an tevcîh olundukdan sonra mukāta‘a-i merkūma dahi ba‘de’l-yevm kendi mutasarrıf olup arsa-i mezkûre üzerinde keyfe mâ yeşâ ebniye ihdâsına cânib-i şer‘den istîzân etmeğin izin verilip, mâ hüve’l-vâki‘ bi’t-taleb ketb olundu. Tahrîren fi’l-yevmi’t-tâsi‘ aşer min şehri Rebî‘ilevvel li sene selâsin ve erba‘în ve elf. Şuhûdü’l-hâl: Fahrü’l-akrân Mirza Çavuş b. ( ), Zahrü’l-akrân Veli Ağa b. ( ), Mehmed Beşe b. Yusuf çukadâr.