Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 211 Hüküm no: 218 Orijinal metin no: [41b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Es-Seyyid Zeynelabidin Efendi b. es-Seyyid Ali’nin Abdi Yazıcı b. Ali’ye borcu olduğu Vilâyet-i Anadolu’da Karaman sancağında Ereğli kasabasında kāimmakām-ı Nakībü’l-eşrâf olup elân Dârü’s-saltanati’s-seniyye mahmiye-i Kostantıniyye’de Karagümrük nâm mevzi‘ kurbunda sâkin olan fahrü’l-eşrâf es-Seyyid Zeynelabidin Efendi b. es-Seyyid Ali nâm kimesne meclis-i şer‘-i celîde, mahmiye-i merkūmede dergâh-ı âlî yeniçerileri çavuşlarından başçavuş yazıcısı bâ‘isü’l-kitâb Abdi Yazıcı b. Ali nâm kimesne mahzarında ikrâr ve takrîr-i kelâm edip, bundan akdem mezbûr Abdi Yazıcı’nın zimmetinde deyn-i şer‘îden olan beş yüz seksen riyâlî guruş hakkının altmış guruş mukābelesinde yedimden altmış guruş kıymetli bir re’s kır atımı alıp kabz edip, mâ‘adâsı olan beş yüz yirmi riyâlî guruşu târih-i kitâb gününden doksan gün tamâmına değin te’cîl eylemiş idi. Hakīkat-i hâl mezbûrdan suâl olunup takrîri tahrîr olunmak taleb ederim dedikde, gıbbe’l-istintâk merkūm Abdi Yazıcı cevâbında, fi’l-hakīka müşârunileyh es-Seyyid Zeynelabidin Efendi zimmetinde deyn-i şer‘îden olan beş yüz seksen riyâlî guruş hakkımın vech-i meşrûh üzre altmış guruşu mukābelesinde yedinden altmış guruş kıymetli bir re’s kır atını alıp kabûl edip [42a] mâ‘adâsı olan beş yüz yirmi riyâlî guruşu târih-i kitâb gününden doksan gün tamâmına değin te’cîl eyledim deyü mûmâ-ileyh es-Seyyid Zeynelabidin Efendi’yi bi’l-muvâcehe tasdîk edicek, mâ vaka‘a bi’t-taleb ketb olundu. Tahrîren fi’l-yevmi’s-sânî ve’l-ışrîn min şehri Rebî‘[ilevvel] min şuhûri sene selâsin ve erba‘în ve elf. Şuhûdü’l-hâl: Mustafa Efendi b. Ahi el-Müderris, İbrahim b. Cafer, Mehmed Çelebi b. Abdullah el-Yesârî, Osman Beşe b. Ömer er-Râcil, Hüseyin b. Ahmed, Piyâle Çavuş b. Abdurrahman, Mansur b. Hamza.