Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 223 Hüküm no: 232 Orijinal metin no: [45a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Askalavete’nin babası Menteş v. Mosi’nin mirasından hakkını aldığı Mahmiye-i İstanbul’da Maruloğlu mahallesi sâkinlerinden iken bundan akdem hâlik olan Menteş v. Mosi nâm yahudinin verâseti, sulbî kebîr oğulları Avraham ve İsak ve David’e ve sagīr oğulları Harun ve Mosi’ye ve sulbiye sagīre kızı Tamarika’ya ve sulbiye kebîre kızları Asdola ve Askalavete’ye münhasıra olduğu şer‘an mütehakkık oldukdan sonra sıgār-ı merkūmînin kıbel-i şer‘den mansûbe vasîleri olan Fadol bt. Avraham nâm Yahudiye meclis-i şer‘-i şerîfde, işbu hâfızu’l-kitâb mezbûre Askalavete mahzarında bi’t-tav‘i’s-sâf ikrâr edip, vasîsi olduğum sıgār-ı merkūmînin babaları hâlik-i mezbûr Menteş’in ücreteyn-i ma‘hûdeteyn ile mutasarrıf olduğu mahalle-i mezbûrede vâki‘ bir tarafı Bostancıbaşı Vakfı ve bir tarafı İsak v. Avraham ve Yasef v. Hamo nâm Yahudiler mülkleri ve iki tarafı tarîk-i âm ile mahdûd beş bâb kârgîr mahzen üzerlerinde kârgîr iki bâb kebîr odalar ve bir sofa ve bir dehliz ve bir hamam ve yine bir mahzen ve üzerinde üç bâb oda ve yine birbirine mukābil iki bâb oda ve bir orta sofa ve iki şehnişîn ve dört bâb büyût-ı ulviye ve süfliye ve bir mahzen ve fevkinde ulvî ve süflî üçer bâb odalar ve bi’r-i mâ ve hadîka ve kenîfi müştemil olup, merhûm Ali Ağa nâm sâhibü’l-hayrın kutbü’l-ârifîn merhûm eş-Şeyh Mahmud Efendi’nin nefs-i Üsküdar’da vâki‘ câmi‘-i şerîflerine vakf eylediği menzil ba‘de helâkihî ale’s-seviyye evlâdına intikāl etmeğin, mezbûre Askalavete’nin sümün hissesini menzil-i mahdûd-ı mezkûrdan mukaddemâ ta‘yîn ve ifrâz için hâlâ kassâm-ı askerî olan fahrü’l-müderrisîn mevlânâ Hamdi Efendi b. Mehmed tarafından irsâl olunan Abdurrahman Efendi ve hâssa mi‘mârlardan Üstâd Musli Çelebi b. Hüsam el-Eyübî menzil-i mezbûrun arsasını ve binâsını keşf ve mesâha eylediklerinde, zikr olunan menzilin binâ zirâ‘ıyla tûlen otuz zirâ‘ ve arzan on yedi buçuk zirâ‘ bi hesâb-i şatrancî beş yüz yirmi zirâ‘ arsası ve bi hesâb-i mezbûr bin iki yüz doksan bir zirâ‘ binâsını cem‘an bin sekiz yüz on altı zirâ‘ binâ ve arsası olduğuna icmâ‘ ve ittifâk eylediklerinden sonra mezbûre Askalavete’nin sümün hissesi için bir tarafı sâlifü’z-zikr Bostancıbaşı Vakfı ve iki tarafı verese-i merkūmîn hisseleri ve bir tarafı mezbûre Askalavete’nin zevci Mosi Yahudi mutasarrıf olduğu menzil ile mahdûd tûlen on dokuz arzan sekiz zirâ‘ bi hesâb-i mezbûr yüz elli iki zirâ‘ arsa üzerinde vâki‘ bir mahzen ve ulvî ve süflî üçer bâb odalar ve fevklerinde bir kameriye ve bi’r-i mâ ve yine tûlen on yedi ve arzan beş zirâ‘ bi hesâb-i mezbûr yüz seksen beş zirâ‘ arsa ki cem‘an iki yüz yirmi yedi zirâ‘ sümün hisse ta‘yîn olundukda, mezbûre Askalavete’nin menzil-i mezbûrdan hissesine isâbet eden tarafı harâbe müşrif olup kal‘i olmayıp sâyir binâ zî-kıymet ve ma‘mûr olmakla tesviye-i husûs için zevci mersûm Mosi’nin menziline muttasıl yine hâlik-i mezbûr menzilinden bâlâda zikr olunan bin sekiz yüz on altı zirâ‘dan mâ‘adâ beher zirâ‘ı ber vech-i tahmîn yüz yirmişer akçeye olmak üzre dokuz bin yüz yirmi akçe kıymetli yetmiş altı zirâ‘ muhavvata tekmîl-i hissesiyçün menzil-i merkūmdan mersûme Askalavete zikr olunan hisseyi kabz ve zabt edip, zikr olunan hissede sıgār-ı merkūmînin min ba‘d alâka ve medhali kalmamışdır dedikde, mezbûre Fadol’un minvâl-i meşrûh üzre cârî sâdır olan ikrârımızı mezbûre Askalavete vicâhen tasdîk edicek, mâ hüve’l-vâki‘ bi’t-taleb ketb olundu. Tahrîren fî evâili şehri Rebî‘ilevvel li sene selâsin ve erba‘în ve elf. Şuhûdü’l-hâl: Veli Ağa b. Mustafa, Mirza Çavuş b. Mustafa, Yusuf Ağa b. Kadı reisü’l-muhzırîn, Mehmed Ağa b. ( ), Ali Çavuş.