Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 224 Hüküm no: 234 Orijinal metin no: [45b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun bt. Mahmud Paşa’nın evini bey‘ bi’l-istiğlâl ile Dilsiz Mehmed Ağa Vakfı’na sattığı Mahmiye-i Galata mahallâtından …? mahallesinde sâkine olan mefharü’l-muhadderât Fâtıma Hâtun bt. merhûm Mahmud Paşa nâm hâtun meclis-i şer‘-i şerîfe -el-masûn ani’t-tağyîr ve’t-tahrîf- hâzıra olup, işbu akdin kendilerinden sudûruna kadar sâhibi ve mâliki olduğu, elinde ve taht-ı tasarrufunda bulundurduğu, ( ) kazâsı tevâbi‘inden Kanlıcak kasabasında vâki‘, bir tarafdan a‘lemü’l-ulemâi’l-izâm Ebussuûdzâde Efendi diye meşhûr Mehmed Efendi mülkü, diğer tarafdan dağ, öteki tarafdan deryâ, diğer tarafdan da tarîk-i âm ile mahdûd bulunan, dâhilî ve hâricî avluyu, fevkānî ve tahtânî büyût-ı müte‘addideyi, mutfağı, hamamı ve helâyı müştemil olan cemî‘-i menzilini cümle tevâbi‘ ve levâhıkıyla râyicü’l-vakt yüz bin akçe semen-i mu‘ayyen-i makbûzla merhûm Dilsiz Mehmed Ağa Vakfı’na mütevellî olan hâfız-ı hâze’l-kitâb bevvâb-ı sultânî Musa Bey b. Haydar’a bey‘ ettiğini ikrâr ve i‘tirâf etti. Mütevellî-i mezbûr da vakf-ı mezbûr mâlıyla ve istiğlâl maksadıyla menzil-i merkūmu iştirâ etti. Bâyi‘a-i mezkûrenin menzili icâreye almak istemesi üzerine, mütevellî-i mesfûr, ba‘de’t-tahliye ve’t-tekābuz zeyilde mezkûr 1043 senesi Rebî‘ulâhir ayının gurresinden [bir sene tâmamına] yirmi bin akçe ücret-i kirâ ile icâreye verdi. Vâki‘ ikrâr mütevellî-i mezbûr tarafından bi’l-muvâcehe tasdîk edildi. Mahmiye-i mahkiyye mahallâtından ( ) mahallesinde sâkin olan umdetü’l-fuzalâi’l-müderrisîn kıdvetü’l-ulemâi’l-mutehakkıkīn Esad Efendi b. Mehmed ve emânet-i mezkûre kāimmakāmı mefharü’l-a‘yân ve’l-emâcid Seyyid Ali Efendi b. ( ) nâm kimesneler menzil-i mezbûrun derkine ve ücret-i kirâya îcâb ve kabûlü hâvî kefâletle kefil oldular. Cerâ zâlike ve hurrire fî evâili âhiri’r-Rebî‘ayn sene selâse ve erba‘în ve elf. Şuhûdü’l-hâl: Ahmed Efendi b. Receb el-kadı, Ali Çelebi b. el-kadı, İshak Çavuş b. Mustafa, Hamza Bey b. Abdullah, Mehmed Çelebi b. Mustafa