Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 225 Hüküm no: 235 Orijinal metin no: [45b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Hasan Ağa b. Mahmud’un bazı reâyâdan alacağı olduğu Vilâyet-i Rumeli’nde Enez kazâsı sükkânından olan re‘âyâ tâifesinden Kominoz v. Berti ve Manol v. Keşiş ve Lazari v. Doma nâm zimmîler meclis-i şer‘-i hatîr-i lâzımü’t-tevkīrde, mahmiye-i Kostantıniyye’de Lâleli Çeşme kurbunda sâkin hâlâ Asesbaşı olan işbu bâ‘isü’l-kitâb fahrü’l-a‘yân el-Hâc Hasan Ağa b. Mahmud tarafından ikrâr-ı âti’z-zikri tasdîka sâbitü’l-vekâle vekîl olan Yusuf Bey b. Abdullah nâm kimesne mahzarında bi tav‘ihim ikrâr ve takrîr-i kelâm edip, müvekkil-i müşârunileyh el-Hâc Hasan Ağa’nın târih-i kitâb gününden üç ay tamâmına değin müeccel ber vech-i iştirâk ve deyn-i şer‘îden zimmetimizde lâzımü’l-edâ ve vâcibü’l-kazâ yüz otuz bin akçe ki te‘kîdü’l-asl ve tavzîhan li’l-kül nısfı altmış beş bin akçe olur hakkı olup ve her birimiz zikr olunan yüz otuz bin akçe hakkından âharın zimmetinde olan mâla ve kabûlü hâviye kefâlet-i sahîha-i şer‘iyye ile kefîl olduğumuza i‘tirâfımızı nâtık ve hat ve hâtemimizi müştemil yedine temessük verdik dediklerinde, mukırrûn-ı merkūmûn Kominoz ve ve Manol ve Lazari kelimât-ı meşrûhalarında merkūm Yusuf Bey dahi bi’l-vekâle tasdîk ettikden sonra kazâ-i mezbûrda vâki‘ memlaha mukāta‘asının bi’l-fi‘il emîni olan İstati v. İstemad nâm zimmî dahi i‘tirâf edip, meblağ-ı merkūm yüz otuz bin akçenin cümlesine tarafeynden emr ve kabûlü hâviye kefâlet-i sahîha-i şer‘iyye ile kefîl olup, ber minvâl-i muharrer olan kefâlet-i merkūmeyi i‘tirâfımı nâtık müvekkil-i mûmâ-ileyhin yedine hat ve hâtemimi müştemil temessük verdim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi[’l-yevmi’l-] âşir şehri Rebî‘ilâhir min şuhûri li sene selâsin ve erba‘în ve elf. Şuhûdü’l-hâl: Es-Seyyid Ali Çelebi b. es-Seyyid Ahmed, Mehmed b. Ahmed eş-şehîr bi Kalender, İsfendiyar Bey b. Abdülkādir el-Cündî, Bâli Bey b. Abdullah el-Cündî, İbrahim Bey b. Abdullah el-Cündî, Yusuf Bey Sarvânî, Ahmed Beşe b. Mehmed er-Râcil, İbrahim b. Mehmed, Mehmed Çelebi.