Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 229 Hüküm no: 241 Orijinal metin no: [47a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Binası yanmış olan vakıf arsanın Mehmed Efendi’ye tevcihi Mahmiye-i Kostantıniyye’de Küçük Karaman kurbunda Pirinççi Mescidi mahallesinde vâki‘ bir tarafı Rumeli kazaskeri muhzırlarından el-Hâc Mahmud nâm kimesne mülkü ve bir tarafı ba‘zan Osman Çavuş mülkü ve ba‘zan Çalık Mustafa nâm kimesne mülkü ve bir tarafı tarîk-i âm ile mahdûd olan menzilin mâliki olup, Rumeli kuzâtından olan merhûm Abdi Efendi nâm sâhibü’l-hayr hâl-i zât ve zamân-ı nefâz-ı tasarrufât ve teberru‘âtından menzil-i merkūmu hasbeten lillâh vakf ve habs edip, süknâsını evvelâ merhûm Paşazâde Efendi’ye ba‘dehû merhûm-ı müşârunileyhin mülâzimlerine ve mülâzimleri bi’l-külliye munkariz oldukdan sonra rûhu için yevmî üç sûre-i İhlâs-ı şerîf tilâvet etmek üzre re’y-i hâkim ile bir racül-i sâlih ve âlime tevcîh ve ta‘yîn oluna deyü şart eylediği menzil, mukaddemâ vâki‘ olan harîk-i azîmde bi’l-külliye muhterik olup tecdîd ve imâretine vakfın müsâ‘adesi olmayıp ve müşârunileyh Paşazâde Efendi’nin mülâzimleri bi’l-külliye munkariz olmakla, ulemâdan ma‘rûf olan işbu bâ‘is[ü’l-kitâb] Mehmed Efendi nâm kimesne süknâya şiddet-i ihtiyâcı olup menzil-i merkūmu kendi mâlı ile tecdîd ve imârete râgıb olmağın, hasbemâ şarti’l-vâkıf menzil-i merkūmun arsa ve nakzı mûmâ-ileyh Mehmed Efendi’ye tevcîh ve ta‘yîn olunup, bu hurûf li ecli’t-temessük ketb ve tahrîr olunup yedine def‘ olundu ki, lede’l-hâce ihticâc ede. Tahrîren fî evâhiri âhiri’r-Rebî‘ayn min şuhûri li sene selâsin ve erba‘în ve elf. Şuhûdü’l-hâl: Umdetü’l-müderrisîn Mehmed Efendi b. Abdullah, Kıdvetü’l-kuzât Mehmed b. el-merhûm Mahmud Efendi, Veli Bey b. Mustafa el-Cündî, Mehmed Bey b. Yusuf er-Râcil, Ali Efendi b. Abdullah el-Müderris.