Bab Mahkemesi 54 Numaralı Sicil (H. 1102 / M. 1691) cilt: 20, sayfa: 220 Hüküm no: 250 Orijinal metin no: [41a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçerilerden İbrahim Beşe b. Mehmed’in eski Turnacıbaşı Mahmud Ağa b. Ahmed’e rüşvet davasında sulh olması Dergâh-ı âlî yeniçerilerinin elli dokuzuncu bölüğüne mahsûs oda yoldaşlarından İbrahim Beşe b. Mehmed nâm kimesne meclis-i şer‘-i şerîf-i enverde, sâbıkan turnacıbaşı olan fahrü’l-eşbâh Mahmud Ağa b. Ahmed b. Abdullah tarafından husûs-ı âti’l-beyâna vekîl olup, Mehmed Beşe b. Veli ve Hüseyin Beşe b. Mehmed şehâdetleriyle şer‘an vekâleti sâbite olan İbrahim Efendi b. Mustafa mahzarında ikrâr ve takrîr-i kelâm edip, müvekkilim mûmâ-ileyh târih-i kitâbdan üç sene mukaddem Antalya dizdârlığı için bi tarîki’l-rüşvet benden altı yüz guruş ahz u kabz etmiş idi, meblağ-ı merkūmu mezbûr Mahmud Ağa’dan da‘vâ eylediğimde, beynimizde ba‘de’n-nizâ‘ muslihûn tavassut edip, da‘vâ-yı mezbûremden beni üç yüz guruşa inşâ-i akd-i sulh eylediklerinde, ben dahi mezbûru kabûl ve bedel-i sulh olan üç yüz guruşu müvekkil-i merkūm Mahmud Ağa yedinden ahz[u] kabz eylediğimden sonra meblağ-ı bâkī iki yüz yetmiş beş guruşa ve sâir beynimizde cereyân eden ahz u i‘tâya müte‘allika âmme-i da‘vâdan müvekkil-i mezbûr Mahmud Ağa’nın zimmetini ibrâ ve iskāt eyledim dedikde, gıbbe’t-tasdîki’ş-şer‘î, mâ vaka‘a bi’t-taleb ketb olundu. Fi’l-yevmi’l-hâdî aşer min Cumâdelâhire li sene isneteyn ve mi’e ve elf. Şuhûdü’l-hâl: Mehmed Kethüdâ b. Hüseyin, el-Hâc Bekir b. ( ), Bekir Efendi b. ( ), Mehmed Beşe b. Veli ve gayruhüm.