Bab Mahkemesi 54 Numaralı Sicil (H. 1102 / M. 1691) cilt: 20, sayfa: 219 Hüküm no: 249 Orijinal metin no: [40b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Efendi b. Osman’ın vakıf arsa üzerinde olan evini Ali Çelebi b. Abdullah’a satması Arsasının süknâsı merhûm Hasan b. Abdullah’ın rûhu için külle yevm bir Fâtiha-i kerîme ve üç İhlâs-ı şerîf kırâ’at etmek üzre bir racul-i sâliha meşrûta vakfı olup, mahmiye-i İstanbul’da Canbâziye mahallesinde vâki‘ üç tarafdan tarîk-i âm ve bir tarafdan Musli Çelebi mülkü ile mahdûd büyûtu müştemil menzile tevcîh-i hâkimü’ş-şer‘le mutasarrıf olan Ahmed Efendi b. Osman nâm kimesne meclis-i şer‘-i şerîf-i enverde, bâ‘isü hâze’l-kitâb Ali Çelebi b. Abdullah mahzarında ikrâr ve takrîr-i kelâm edip, menzil-i mezkûrun ebniyesi yedimde olan hüccetde tasrîh ve beyân olunduğu üzre mülküm olmağla, hâlâ ebniye-i mezkûreyi tarafeynden îcâb ve kabûlü hâvî bey‘-i kat‘î ile on sekiz bin akçeye mezbûr Ali Çelebi’ye bey‘ ve teslîm, ol dahi ba‘de’l-iştirâ ve’t-tesellüm semen-i mezkûru mezbûr Ali Çelebi’den bi’t-tamâm ahz u kabz edip, arsa-i mezkûreden dahi kasr-ı yed eyledim dedikde, gıbbe’t-tasdîki’l-mer‘î arsa-i mahdûde-i mezkûre ber-mûceb-i şart-ı vâkıf mesfûr Ali Çelebi’ye kıbel-i şer‘den tevcîh olunmağın, mâ vaka‘a bi’t-taleb ketb ve imlâ olundu. Fi’l-yevmi’l-âşir min Cumâdelâhire sene 1102. Şuhûdü’l-hâl: Abdullah Efendi b. Receb, Mustafa Efendi b. İbrahim, Ahmed Ağa b. Mehmed, Musli b. Ahmed, el-Hâc Mehmed b. Abdi, İbrahim Çelebi b. Ahmed, Osman [b.] Şaban, diğer İbrahim Çelebi b. Ahmed.