Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 240 Hüküm no: 255 Orijinal metin no: [50a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman b. Ahmed’in karısı Hümâ Hatun bt. Abdullah’a borcunu ödemesi gerektiği Mahmiye-i İstanbul’da Ayasofya-i Kebîr câmi‘-i şerîfi kurbunda sâkine işbu râfi‘atü’l-kitâb Hümâ Hâtun bt. Abdullah meclis-i şer‘-i hatîr-i lâzımü’t-tevkīrde, zevci olan Süleyman b. Ahmed mahzarında üzerine da‘vâ edip, zevcim mersûm Süleyman zimmetinde lede’l-cîrân ma‘lûmü’l-hudûd mülk-i bahtım olup bey‘ eylediğim menzil semeninden on dört aded sikke-i hasene ve yirmi bin kıt‘a riyâlî guruş ve on dört miskāl altın [ve] bilezik semeninden iki bin akçe ve zirâ‘ı beynimizde ma‘lûm keten bezi bahâsından bin akçe hakkım vardır taleb eylerim suâl olunsun dedikde, gıbbe’s-suâl mersûm Süleyman cevâbında, fi’l-vâki‘ zevcem mersûme Hümâ Hâtun’a minvâl-i muharrer üzre on dört sikke-i hasene ve yirmi beş kıt‘a riyâlî guruş ve bilezik ve keten bezi bahâsından üç bin akçe deynim olup, lâkin sâlifü’z-zikr on dört altının on iki altınını mersûme Hümâ Hâtun’a edâ ve teslîm eyledim deyicek, gıbbe’s-suâl ve’l-inkâr, mersûm Süleyman’dan da‘vâsına mutâbık beyyine taleb olundukda, ityân-ı beyyineden izhâr-ı acz edip istihlâf eylemeğin, mersûme Hümâ Hâtun dahi mârrü’z-zikr on iki altını zevci mersûm Süleyman’dan ahz ve kabz eylemediğine yemîn billâhi’l-aliyyi’l-a‘lâ etmeğin, mûcebi ile meblağ-ı mârrü’l-beyân on dört sikke-i hasene ve yirmi bin kıt‘a riyâlî guruşu ve üç bin akçeyi mersûme Hümâ Hâtun’a teslîme merkūm Süleyman’a tenbîh birle, mâ vaka‘a bi’t-taleb ketb olundu. Fi’l-yevmi’s-sâbi‘ min Zilka‘deti’ş-şerîfe li sene isneteyn ve erba‘în ve elf. Şuhûdü’l-hâl: El-Hâc İvaz b. Mehmed, Mehmed b. Mehmed, Mehmed b. Hüseyin, Yunus b. Hüdâverdi ve gayruhüm.