Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 241 Hüküm no: 256 Orijinal metin no: [50a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Ali’nin malik olduğunu iddia ettiği evin İlyas Beşe tarafından satın alındığının sâbit olduğu Mahmiye-i İstanbul’da ( ) mahallesi sâkinlerinden Ahmed b. Ali nâm kimesne meclis-i şer‘-i hatîr-i lâzımü’t-tevkīrde, menzil-i âti’l-beyâna hâlâ vâzı‘u’l-yed idiği şer‘an sâbit olan işbu hâmilü’l-kitâb İlyas Beşe b. ( ) mahzarında üzerine takrîr-i da‘vâ edip, hâlâ mezbûr İlyas Beşe’nin yedinde olup mahmiye-i mezkûre mahallâtından Oruc Gāzi mahallesinde vâki‘ bir tarafı Fâtıma Hâtun Vakfı ve bir tarafı Haraccı İbrahim Çelebi mülkü ve iki tarafı tarîk-i âm ile mahdûd olup üç beyt-i süflîyi ve iki beyt-i ulvîyi ve iki su kuyusunu ve iki cüneyneyi müştemil olan menzili târih-i kitâbdan iki sene mukaddem Mehmed b. Hüseyin nâm kimesneden şirâ-i şer‘î ile kırk bir bin beş yüz elli akçeye iştirâ ve tesellüm eyleyip mülk-i mahzım olmuş iken mezbûr İlyas Beşe menzil-i mahdûd-ı mezkûra bi gayri vech-i şer‘î vaz‘-ı yed eder suâl olunup kasr-ı yedine tenbîh olunmak matlûbumdur [50b] dedikde, gıbbe’s-suâl mezbûr İlyas Beşe cevâbında, menzil-i mahdûd-ı mezkûru ben târih-i kitâbdan altı sene mukaddem Fâtıma bt. ( ) nâm hâtun ile Veli b. Hüseyin nâm kimesneden altı bin mezbûru’n-na‘t akçeye iştirâ ve tesellüm eyleyip mülk-i mahzım olmuşdur deyü def‘ ile mukābele edicek, mezkûr İlyas Beşe’den sıdk-ı kelâmına beyyine taleb olundukda, udûl-i ricâlden Mehmed Efendi b. ( ) ve Ali Efendi b. ( ) nâm kimesneler li ecli’ş-şehâde mahfil-i kazâya hâzırân olup gıbbe’l-istişhâd, fi’l-vâki‘ mezbûr İlyas Beşe menzil-i mahdûd-ı mezkûru târih-i kitâbdan altı sene mukaddem Fâtıma bt. ( ) nâm hâtun ile Veli b. Hüseyin nâm kimesneden bizim huzûrumuzda elli bin nakd-i râyic fi’l-vakt akçeye iştirâ ve tesellüm edip, onlar dahi bey‘ ve teslîm eydiklerinden sonra semen-i mezkûr elli bin akçeyi mezbûr İlyas Beşe yedinden bi’t-tamâm ve’l-kemâl ahz ve kabz eyledi. Biz bu husûsa şâhidleriz şehâdet dahi ederiz deyü edâ-i şehâdet-i şer‘iyye ettiklerinde, gıbbe’t-ta‘dîl ve’t-tezkiye şehâdetleri hayyiz-i kabûlde vâkı‘a oldukdan sonra mûcibi ile mezbûr Ahmed min ba‘d mezkûr İlyas Beşe’ye mu‘ârazadan men‘ birle mâ vaka‘a bi’t-taleb ketb olundu. Tahrîren fî evâhiri Zilka‘deti’ş-şerîfe li sene isneteyn ve erba‘în ve elf. Şuhûdü’l-hâl: Fahrü’l-a‘yân Muslihiddin Ağa b. ( ) kethüdâ-yı Yeniçeriyân sâbıkan, İftihârü’l-emâsil ve’l-a‘yân Hasan Ağa Turnacıbaşı sâbıkan, Fahrü’l-akrân Hamza Ağa, Fahrü’l-eşbâh Sefer Ağa es-sarrâcü’s-sultânî, Ramazan Efendi b. ( ) el-Müderris, Mehmed Efendi b. ( ) el-Müderris, Şaban Efendi b. ( ) el-Hatîb, el-Hâc Mehmed b. ( ) er-Râcil, Ali Çelebi b. ( ) er-Râcil, Hüseyin Dede b. ( ) eş-şehîr bi Korkun?, Hüseyin b. Hasan, Cafer b. Abdullah, Ali Bey b. ( ), Hasan Ağa b. ( ), Ali b. Davud, Mehmed Çelebi b. Mehmed ve gayruhüm.