Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 242 Hüküm no: 257 Orijinal metin no: [50b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Abdullah’ın Ahmed Ağa’nın muhallefâtı konusunda Mehmed Çelebi ile sulh olduğu Dârü’s-saltanati’l-aliyye Kostantıniyyetü’l-mahmiyye’de Haydarhâne mahallesinde sâkin iken bundan esbak vefât eden merhûm Ahmed Ağa nâm kimesnenin karındaşı oğlu ve bi’l-inhisâr vârisi olan İbrahim b. Abdullah nâm râcil meclis-i şer‘-i hatîr-i lâzımü’t-tevkīrde, zikri âtî olan menzil ve bağlarda hâlâ mülkiyet üzre vâzı‘u’l-yed olduğu şer‘an sâbit ve mütehakkık olan râfi‘-i hâze’l-kitâb fahrü’l-ahâlî Mehmed Çelebi b. Bâli mahzarında ikrâr-ı tâm ve takrîr-i kelâm edip, mahrûse-i Galata kazâsında Balta Limanı demekle ma‘rûf mevzi‘de vâki‘ etrâf-ı erba‘ası sâhil-i bahri vely eden tarîk-i âm ve arz-ı hâliye ile mahdûd dâhiliyesi iki bâb oda ve bir mahzen ve bir kayıkhâne ve bir su kuyusunu ve hâriciyesi bir oda ve bir matbah ve bir hadîkayı müştemil ve mârrü’z-zikr menzil kurbunda vâki‘ etrâf-ı erba‘ası merhûm İbrahim Paşa ve Uzunsolak demekle ma‘rûf Mehmed Bey b. ( ) ve Abdullah Efendi b. ( ) bağları ile mahdûd biribirine muttasıl üç kıt‘a bağ mûrisim ve ammim mersûm Ahmed Ağa’nın muhallefâtından olup, bi hasebi’ş-şer‘î bana intikāl etmiş iken zikr olunan menzil ve bağlara mersûm Mehmed Çelebi bi gayri vech-i şer‘î vaz‘-ı yed eyledi deyü bin otuz sekiz senesi Zilhicce’sinin yirminci gününde taleb ve da‘vâ eyledikde, ol dahi sâlifü’z-zikr menzil ve bağlar müteveffâ-yı mezbûr Ahmed Ağa’dan hâl-i hayâtında ve kemâl-i sıhhatinde safka-i vâhide ile yetmiş bin makbûz akçeye iştirâ eyledim dedikde, beynimize muslihûn tavassut edip husûs-ı mersûmdan on sekiz bin akçe ile iki bin akçe kıymetli bir kırmızı çuka ferâce üzerine inşâ-i akd-i sulh eylediklerinde, ben dahi sulh-ı merkūmu kabûl ve bedel-i sulh olan meblağ-ı mersûm on sekiz bin akçe ile zikr olunan kırmızı çuka ferâceyi yedinden ahz u kabz eylemiş idim. Lâkin mezbûr Mehmed Çelebi iddi‘â eylediği sâlifü’z-zikr şirâ esnâsında semen-i müşterâ için sâlifü’z-zikr Ahmed Ağa’ya üç yüz sikke-i hasene verip verdiği mikdâr-ı mezkûr hasene mûrisim olan merkūm Ağa’nın mâlı olup vech-i mezkûr üzre olan mu‘âmeleleri muvâza‘a idiği ma‘lûmum olmakla, makbûzum olan mikdâr-ı mezkûr sikke-i hasene benim hakk-ı mevrûsum olur deyü verâset-i mahkiyyem hasebiyle taleb eylediğimde beynimize muslihûn tavassut edip husûs-ı mersûmdan dahi yirmi iki bin akçe üzerine inşâ-i akd-i sulh eyledikde ben dahi sulh-ı mersûmu kabûl ve bedel-i sulh olan meblağ-ı mastûr yirmi iki bin akçeyi mersûm Mehmed Çelebi yedinden bi’t-tamâm ahz ve kabz edip, târih-i kitâba değin mersûm Mehmed Çelebi ile mûrisim müteveffâ-yı merkūmun muhallefâtına müte‘allik bi vechin mine’l-vücûh alâka ve medhalim yokdur, ba‘de’l-yevm benden asâleten ve yahud vekâleten mûrisim müteveffâ-yı merkūmun muhallefâtına müte‘allik da‘vâ ve nizâ‘ sudûr ederse lede’l-hükkâmi’l-kirâm makbûle ve mesmû‘a olmasın dedikde, mukırr-ı mersûm İbrahim Beşe’nin vech-i meşrûh üzre cârî ve sâdır olan ikrârın mersûm Mehmed Çelebi vicâhen tasdîk ve şifâhen tahkīk eyledikden sonra vâki‘ hâl bi’t-taleb ketb olundu. Fi’l-yevmi’s-sâmin ve’l-ışrîn min Zilka‘deti’ş-şerîfe li sene isneteyn ve erba‘în ve elf. Şuhûdü’l-hâl: Umdetü’l-emâcid ve’l-a‘yân Ömer Ağa b. Ali sekbanbaşı sâbıkan, Derviş Çavuş b. Abdullah el-Mübâşir, Hamza Efendi b. Ahmed el-İmâm, Umdetü’l-kuzât Zeynî Efendi b. Mustafa, Osman b. Abdullah, Çaker Çavuş b. Abdullah, Yusuf Beşe b. Abdullah er-Râcil, İbrahim Beşe b. Abdullah er-Râcil, Mustafa Efendi b. ( ) el-mülâzım, Mehmed Çelebi b. el-Hâc Hüsam el-Müezzin, el-Hâc Ali b. (…), Hasan b. Mehmed, Ramazan Beşe b. ( ) er-Râcil, Ramazan b. ( ) destârî, Ebûbekir b. Ali, Rıdvan Bey b. Abdullah el-Cündî.