Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 249 Hüküm no: 261 Orijinal metin no: [52b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gülâbî bt. Abdullah’ın evini Selime Hatun bt. Kurd’a sattığı Mahmiye-i İstanbul’da Kızılminâre mahallesinde sâkine Gülâbî bt. Abdullah nâm hâtun mahfil-i kazâda, mahalle-i mezbûrede sâkine râfi‘atü’l-kitâb Selime Hâtun bt. Kurd mahzarında ikrâr ve takrîr-i kelâm eyleyip mahmiye-i mezbûrede Silivrikapısı dâhilinde İbrahim Paşa mahallesinde vâki‘ tarafeyni tarîk-i âm ve bir tarafı Takyeci Ferhad Vakfı ve Naci[ye] Hâtun mu‘allimhânesi ve bir tarafı Ömer Beşe b. Abdullah ve Ali Beşe b. Abdullah mülkleri ile mahdûd muhavvata-i dâhiliyesi iki bâb tahtânî ve dört bâb fevkānî büyûtu ve üç sofa ve bir tahta-pûş ve iki fırın ve bir su kuyusu ve hadîka ve kenîfi muhtevîye ve muhavvata-i hâriciyesi bir ahır ve bir su kuyusu ve on bir bâb dükkânı muhtevîye olan menzilin nısf-ı şâyi‘i benim mülküm ve nısf-ı şâyi‘-i âharı mezkûre Selime Hâtun’un mülkü olmağın, vech-i meşrûh üzre menzil-i mahdûd-ı mezbûrun mülküm olan nısf-ı şâyi‘ini mezkûre Selime Hâtun’a yüz altmış bin fıddî ve râyic fi’l-vakt akçeye bey‘-i bât-ı sahîh-i şer‘î ile bey‘ ve teslîm eyleyip, ol dahi vech-i meşrûh üzre iştirâ ve tesellüm eyledikden sonra semeni olan meblağ-ı mezbûru yedinden bi’t-tamâm alıp kabz eyledim. Ba‘de’l-yevm menzil-i mahdûd-ı mezbûrun cümlesi mezkûre Selime Hâtun’un mülk-i müşterâsıdır dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fî evâsıtı Rebî‘ilâhir li sene selâsin ve erba‘în ve elf. Şuhûdü’l-hâl: Mustafa Çelebi b. Ahmed, Mustafa b. Hasan er-Râcil, Ahmed Çelebi b. Mustafa, Mustafa Halîfe el-İmâm, İskender Bey b. Şaban, Yunus Bey b. ( ), Yusuf Bey b. ( ).