Bab Mahkemesi 54 Numaralı Sicil (H. 1102 / M. 1691) cilt: 20, sayfa: 221 Hüküm no: 252 Orijinal metin no: [41a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Efendi b. Musa’nın tedavi için Mosi v. Şimer’a verdiği parayı varislerinin sulh yoluyla geri alması Mahmiye-i İstanbul’da Mesih Hasan Paşa mahallesinde sâkin iken bundan akdem vefât eden Ahmed Efendi b. Musa b. Halil’in verâseti, zevce-i metrûkesi Şerife Râbia bt. Davud nâm hâtun ile sulbî kebîr oğlu Mehmed ve sulbî oğulları Lütfullah ve Sunullah nâm sagīrlere münhasıra olduğu şer‘an zâhir ve mütehakkik oldukdan sonra mezbûre Râbia kendi tarafından asâleten ve sagīrân-ı mezbûrânın kıbel-i şer‘den mansûbe vasîleri olmağla vesâyeten mezbûr Mehmed dahi asâleten meclis-i şer‘-i şerîf-i enverde, Nurdade? cemâ‘atinden bâ‘isü hâze’s-sifr Mosi v. Şimer nâm Yahudi muvâcehesinde her biri ikrâr ve takrîr-i kelâm [edip], mûrisimiz müteveffâ-yı mezbûr Ahmed Efendi bir maraza mübtelâ olmağla mezbûr Mosi ben sana mu‘âlece edeyim deyu bi gayri hakkın otuz yedi buçuk guruşunu ahz u kabz etmekle, meblağ-ı mezbûru taleb ve da‘vâ eylediğimizde, beynimizde nizâ‘-ı küllî vukū‘undan sonra muslihûn tavassut edip, da‘vâ-yı mezkûremizden bizi mezbûr Mosi ile yirmi guruş üzerine sulh eylediklerinde, biz dahi asâleten ve vesâyeten sulh-ı mezbûru kabûl ve bedel-i sulh olan meblağ-ı mezbûr yirmi guruşu mezbûr Mosi yedinden tamâmen ahz u kabz ettiğimizden sonra husûs-ı mezkûra müte‘allika da‘vâdan biz mezbûr Mosi’nin zimmetini ibrâ ve iskāt edip, mezbûr Mosi dahi bedel-i sulh olmak üzre bize medfû‘u olan yirmi guruşa müte‘allika da‘vâdan bizim zimmetimizi ibrâ ve iskāt eyledi dediklerinde, gıbbe’t-tasdîki’ş-şer‘î, mâ vaka‘a bi’t-taleb ketb olundu. Fi’l-yevmi’s-sâmin min Cumâdelâhire sene 1102. Şuhûdü’l-hâl: Mehmed b. Davud, Mustafa b. Mehmed, Ahmed Çelebi b. Musli, Mehmed Beşe b. Mustafa.