Bab Mahkemesi 54 Numaralı Sicil (H. 1102 / M. 1691) cilt: 20, sayfa: 221 Hüküm no: 253 Orijinal metin no: [41a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun bt. Mehmed’in hâlinin kötü ve mahallelinin şikâyetçi olması Mahmiye-i İstanbul’da Firuzağa mahallesi imâmı olan Mehmed Efendi b. İbrahim meclis-i şer‘-i şerîfde mahalle-i mezbûre sâkinelerinden Adalı Fâtıma Hâtun bt. Mehmed mahzarında takrîr-i kelâm ve ta‘bîr ani’l-merâm edip, mezbûre Fâtıma Hâtun nâ-mahremden ictinâbı olmamağla, bi’d-defa‘ât kapısı katranlanıp sû’-i hâl üzre olmağla mezbûreden müte’ezzî ve mutazarrır olmağın, hâlâ kıbel-i şer‘den mahalle-i mezbûreye varılıp keyfiyet-i hâli vukūfu olan müslimînden suâl olunup haberleri tahrîr olunmak matlûbumdur dedikde, husûs-ı mezbûr için fermân-ı şerîf dahi ibrâz etmeğin, imtisâlen-lehû savb-ı şer‘den irsâl olunan Ebûbekir Efendi mahalle-i mezbûreye varıp, ba‘dehû akd-i meclis mezbûre Fâtıma’nın keyfiyet-i hâli vukūf-ı tâm ı olup mahalle-i mezbûre ahâlîsinden Mehmed Ağa b. Ebûbekir ve el-Hâc Ahmed b. Hasan ve Mustafa Çelebi b. Veli ve el-Hâc Ömer b. Hüsameddin ve Mehmed Efendi el-Hattât ve Bevvâb Mehmed Beşe b. Muharrem ve el-Hâc Mehmed b. Ali ve Kenan b. Abdullah ve Veli b. Mehmed ve Mehmed b. Abdurrahman ve el-Hâc Ömer b. Hüseyin ve Süleyman b. Ali ve Mehmed Dede ve sâirlerinden suâl olundukda, fi’l-hakīka mezbûre Fâtıma nâ-mahreminden ictinâbı olmamağla bi’d-defa‘ât kapısı katranlanıp sû’-i hâl üzredir deyu her biri muvâcehesinde alâ tarîki’ş-şehâde haber vermeğin, vâki‘ hâli mezbûr Ebûbekir Efendi mahallinde tahrîr edip, ba‘dehû ma‘an ba‘s olunan Mehmed b. İbrahim ve Mehmed Çelebi ile meclis-i şer‘a gelip alâ vukū‘ihî inhâ ve takrîr etmeğin, mâ hüve’l-vâki‘ bi’t-taleb ketb olundu. Fi’l-yevmi’s-sâlis min Cumâdelâhire sene 1102. Şuhûdü’l-hâl: Mehmed Bey b. Habib, Mehmed Efendi b. Said, Hüseyin Çelebi b. Hüseyin, Osman b. Veli, Mehmed Çelebi b. Abdullah.