Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 252 Hüküm no: 266 Orijinal metin no: [53b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Murad Çelebi b. Rıdvan’ın zimmîlerden gulâmiyye bedelinden alacağı kalmadığı Atebe-i aliyyede sâbıkan sekbanbaşı olan umdetü’l-emâcid ve’l-ekârim câmi‘u’l-mehâmid ve’l-mekârim Nasuh Ağa adamlarından Murad Çelebi b. Rıdvan nâm râcil mahfil-i kazâda, mahmiye-i Galata muzâfâtından olup merhûm ve mağfûrun-leh Şehzâde Sultan Mehmed Hân -aleyhi’r-rahmetü ve’r-rıdvân- evkāfından Marmara ve Kapudağı ve Mirali ve Kızılada ve Maltepe nâhiyeleri sâkinlerinden olup kendi taraflarından asîl ve sâir evkāf-ı mezbûre re‘âyâsı taraflarından husûs-ı âtîye vekîl olup, vekâletleri nehc-i şer‘î üzre sâbite olan Kelavnoz v. Kiryako ve Papa Todori v. ( ) ve Yorgi v. Kiryako ve Yorgaki v. Asparinor ve Talaşkoz v. İskarinoz ve Maskalyo Reis v. ( ) ve Papa Yanaki v. ( ) ve Yanaki v. Nikola ve Yanaki v. Paloç ve Falko v. Polo ve Kiryako v. Dimo ve Lefota v. Somi ve Uzun İstemad v. ( ) ve Papa Vasalko v. ( ) ve Papa Çanko v. Yorgi ve Kostantin v. Preşkova ve Totol v. Yakomi ve Doket v. ( ) ve Panayot v. Luka ve Panayot Reis v. Falahto ve Papa Yomi v. ( ) ve Londani v. ( ) nâm zimmîler muvâcehelerinde bi tav‘ihî ikrâr ve i‘tirâf ve takrîr-i kelâm edip, evkāf-ı mezbûreden nevâhî-i merkūmede ve gayride sâkin olan zimmî re‘âyâdan bin kırk bir senesinde ber mûceb-i berât-ı şerîf ve defter-i âlî altı bin kırk nefer olmak üzre ziyâde-i cizyeleri cem‘ine me’mûr olup ziyâde-i cizyeyi ve hizmetim mukābelesinde yedi bin riyâlî guruş gulâmiyyeyi mezbûrûn zimmîlerden ve müvekkillerinden taleb edip merkūmûn zimmîler bizim ziyâde-i cizyemiz için taraf-ı mîrîye beher sene kırk iki bin çeki odun maktû‘dur her sene cânib-i mîrîye bi’t-tamâm teslîm eyleriz ve târih-i kitâba gelince taleb olunan mikdârı gulâmiyye veregelmedik dediklerinde, tavassut-ı müslimîn ile mezbûrûn zimmîler yedlerinden asâleten ve vekâletleri hasebiyle gulâmiyye nâmına yedi bin riyâlî guruş alıp kabz edip yedimde olan berât ve defteri mezbûrûn zimmîlere teslîm eyledim. Ba‘de’l-yevm mezbûrûn zimmîler ve müvekkilleri zimmetlerinde gulâmiyye nâmında bir akçe ve bir habbem kalmadı. Ba‘de’l-yevm bundan asâleten veya vekîlimden vekâleten husûs-ı mezbûra müte‘allik mezbûrûn zimmîler ve müvekkillerinden taleb ve da‘vâ sudûr ederse, lede’l-hükkâm makbûle ve mesmû‘a olmasın dedikde, mukırr-ı mezbûr Murad Çelebi’nin vech-i meşrûh üzre cârî olan ikrârın merkūmûn zimmîler asâleten ve vekâleten vicâhen tasdîk ve şifâhen tahkīk edicek, mâ hüve’l-vâki‘ bi’t-taleb ketb olundu. Tahrîren fî gurre-i Zilka‘deti’ş-şerîfe li sene isneteyn ve erba‘în ve elf. Şuhûdü’l-hâl: Umdetü’l-a‘yân Derviş Ağa b. Ali Muhzır Ağa hâlâ, Fahrü’l-akrân Mustafa Çelebi b. ( ) çavuş-ı yeniçeriyân, Umdetü’l-emâcid ve’l-ekârim Durak Ağa b. ( ) çavuşbaşı hâlâ, Umdetü’l-a‘yân Osman Ağa b. ( ) el-mütevellî bi Câmi‘-i Şehzâde, Fahrü’l-akrân Hasan Bey b. Mustafa kethüdâ, Hasan Çavuş b. Mustafa, Piyâle Bey b. Abdullah el-bevvâb, el-Hâc Hüsam b. Mehmed el-muhzır, Yusuf Bey b. Şaban el-muhzır ve gayruhüm. Bu sicil buraya gelince merhûm ve mağfûrun-leh Karaçelebizâde Mehmed Efendi b. el-merhûm Hüsam Efendi’nin def‘a-i sâniyede Rumeli kazaskeri olduklarında kayd olunan vekāyi‘in cild-i sâlisidir ki şer‘iyyâtı Atazâde Mehmed Efendi zamânında vâki‘ olmuşdur. İnteha’l-kelâm fî zemâni el-müvellâ el-merhûm el-müşârunleh fî hâze’l-makām. [mühür]