Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 254 Hüküm no: 267 Orijinal metin no: [54a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Ali ve Ebûbekir’in Fâtıma bt. Veli Hoca’nın ırzına kast ettiklerini itiraf ettikleri Vilâyet-i Anadolu’da medîne-i Kayseriye muzâfâtından Erguncak nâm karye ahâlîsinden Ömer Beşe b. İbrahim nâm kimesne meclis-i şer‘-i şerîfe Mustafa b. Ali nâm kimesneyi ihzâr ve mahzarında takrîr-i kelâm ve bast-ı merâm edip târih-i kitâbdan bir buçuk sene mukaddem mezbûr Mustafa ve refîki olup gāib ani’l-meclis olan Ebûbekir b. ( ) nâm kimesne gece ile karye-i mezbûrede hâlâ zevcem olan Fâtıma bt. Veli Hoca nâm hâtun sâkine olduğu menzilin duvarından aşıp fi‘l-i şenî‘ kasd eylemişdir. Suâl olunup takrîri tahrîr olunmak matlûbumdur dedikde gıbbe’s-suâl mezbûr Mustafa cevâbında hizmet eylediğimiz ağamız Hüseyin Bey nâm cündînin mezbûre Fâtıma Hâtun ile husûmeti olup bir gece varın ırz eksikliği edin deyü beni ve gāib ani’l-meclis olan mezbûr Ebûbekir’i irsâl eyledikde biz dahi gece ile varıp mezbûre Fâtıma Hâtun’un sâkine olduğu menzilin duvarından aşıp girdik, mezbûre Fâtıma Hâtun tâyi‘a olmayıp feryâd eyledikde, ahâlî-i karye gelip mezbûreyi yedimizden halâs eylediler dediklerinde vâki‘ hâl hıfzan li’l-makāl ketb olundu. Tahrîren fi’l-yevmi’r-râbi‘ aşer min Zilhicceti’ş-şerîfe li sene isneteyn ve erba‘în ve elf. Şuhûdü’l-hâl: Mustafa Beşe b. Ali mumcu, Kâtib Ali Efendi b. Hızır, Ömer Beşe b. Osman er-Râcil, Receb Beşe b. Hüseyin, İsmail b. Hüseyin, Osman b. Ömer ve gayruhüm.