Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 257 Hüküm no: 273 Orijinal metin no: [55b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Hasan b. Üveys’in evini Hasan Beşe b. Receb’e sattığı Vilâyet-i Anadolu’da Bolu sancağında Kuhbaz kazâsında Dikenli nâm karye ahâlîsinden olup hâlâ dârü’s-saltanati’s-seniyye mahmiyye-i Kostantıniyye’de Karagümrük nâm mevzi‘ kurbunda sâkin olan el-Hâc Hasan b. Üveys nâm kimesne meclis-i şer‘-i hâtiru’t-tevkīrde, işbu hâfızu’l-kitâb fahrü’l-eşbâh Hasan Beşe b. Receb er-Râcil mahzarında bi tav‘ihî ikrâr ve takrîr-i kelâm edip karye-i merkūmede vâki‘ bir beyt-i ulvîyi ve altında ahırı ve önünde anbarı ve bi’r-i mâyı ve ve bir etmek fırınını müştemil olup inde ahâli’d-diyâr bana intimâ ile ma‘lûmü’l-hudûd ve’l-mikdâr olan bir bâb mülk menzilimi, cümle hudûdu ve kâffe-i hukūku ile merkūm Hasan Beşe’ye sekiz yüz nakd-i râyic fi’l-vakt fıddî akçeye bey‘-i kat‘î ile bey‘ eylediğimde, mezbûr dahi vech-i meşrûh üzre iştirâ ve kabûl eyledikden sonra semen-i merkūmu bi’t-tamâm ve’l-kemâl mezbûr Hasan Beşe yedinden alıp kabz edip, mebî‘-i mezkûru mahallinde kabz ve zabt etmek için mezbûru taslît eyledim dedikde, mukırr-ı merkūm el-Hâc Hasan’ı müşterî-i mesfûr Hasan Beşe dahi bi’l-muvâcehe tasdîk ve minvâl-i muharrer üzre iştirâ ve kabûl eylediğini tahkīk edicek, mâ vaka‘a bi’t-taleb ketb olundu. Tahrîren fi’l-yevmi’s-sânî aşer min Cemâziyelevvel min şuhûri sene selâsin ve erba‘în ve elf. Şuhûdü’l-hâl: İbrahim Efendi b. Hasan el-kadı, Ahmed Çelebi b. Mehmed el-Müderris, Hüseyin b. Resûl, Hüsam Bey b. ( ) el-Cündî, Hüseyin b. Abdi.