Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 257 Hüküm no: 272 Orijinal metin no: [55a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Abdülkerim b. Hüdaverdi’nin Hızır Paşa b. Ali’ye borcu olduğu Hâlâ eyâlet-i Eğri beylerbeyisi olan emîrü’l-ümerâi’l-kirâm kebîrü’l-küberâ’i’l-fihâm Hızır Paşa b. Ali nâm kimesne meclis-i şer‘-i şerîf-i Nebevî ve mahfil-i dîn-i münîf-i Mustafavî’de, mahmiye-i İstanbul’da Mahmud Paşa mahallesinde râfi‘ü’l-kitâb el-Hâc Abdülkerim b. Hüdâverdi nâm kimesne mahzarında ikrâr-ı sahîh-i şer‘î ve i‘tirâf-ı sarîh-i mer‘î eyleyip, mezkûr el-Hâc Abdülkerim’den beş bin aded esedî guruş istikrâz ve bin beş yüz esedî guruşluk beynimizde mikdâr ve cinsi ma‘lûm emti‘a-i mütenevvi‘a iştirâ ve kabz eyleyip, cem‘an vech-i meşrûh üzre mezkûr el-Hâc Abdülkerim’in zimmetinde elli bin beş yüz aded mezkûru’n-na‘t hakkı olup mâ‘adâ-yı kabzı olan bin beş yüz guruş târih-i kitâb senesinde vâki‘ gurre-i Rebî‘ilâhir’den yüz seksen gün tamâmına değin mev‘ûd ve müecceldir dedikde, mukırr-ı müşârunileyhi ikrâr-ı meşrûhunda el-mukarru lehü’l-mezbûr el-Hâc Abdülkerim vicâhen tasdîk etmeğin, mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâdî aşer min Cemâziyelevvel li sene selâsin ve erba‘în ve elf. Şuhûdü’l-hâl: Fahrü’l-akrân Mehmed Çavuş b. Koçu, Abdullah Efendi b. ( ) el-kadı, İbn Şeyh Hasan Efendi, Süleyman Bey b. Abdullah, Ahmed Bey b. Süleyman, Hüseyin b. ( ).