Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 260 Hüküm no: 277 Orijinal metin no: [56a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Beşe’nin vârislerinin ev ve tarlalarını Mehmed Beşe b. Şaban’a sattıkları Vilâyet-i Rumeli’nde medîne-i Yenişehir kazâsına tâbi‘ Hasanbaba nâm karye ahâlîsinden olup mukaddemâ mahmiye-i İstanbul’da Koruk Mahmud mahallesinde sâkin iken müteveffâ olan Hüseyin Beşe b. ( ) nâm kimesnenin verâseti sulbî kebîr oğlu Mehmed nâm şâbbe ve sulbiye kebîre kızı Aişe’ye münhasıra olmağın, mezkûr Mehmed asâleten ve merkūme Aişe tarafından husûs-ı âti’l-beyânda vekîl olup, hasm-ı münkir-i şer‘î mahzarında Ahmed b. Mehmed ve Cafer b. Abdullah şehâdetleri ile vekâleti sâbite olan Rıdvan Bey b. Abdullah nâm kimesne vekâleten mahfil-i şer‘-i şerîfde, kırk üçüncü yayabaşılar cemâ‘atinden râfi‘ü’l-kitâb Mehmed Beşe b. Şaban nâm kimesne mahzarında ikrâr ve takrîr-i kelâm eyleyip, mûrisimiz müteveffâ-yı mesfûrun muhallefâtından karye-i mezbûrede vâki‘ bir tarafı Kalender b. ( ) mülkü ve bir tarafı Şaban b. ( ) mülkü ve bir tarafı Mahmud b. ( ) mülkü ve bir tarafı tarîk-i âm ile mahdûd büyût-ı müte‘addideyi müştemil olan menzili ve yine kazâ-i mezkûra tâbi‘ Laspahor nâm karyede vâki‘ tarafeyni Ömer Bey b. ( ) ve Mehmed Efendi mülkleri ve tarafeyni tarîk-i âm ile mahdûd olup eşcâr-ı müsmire ve gayr-ı müsmireyi hâvî iki dönüm mikdârı kıt‘a bağı ve menzil-i mezbûr dâhilinde beynimizde ilm-i şer‘î ile ma‘lûm âlât-ı zirâ‘at ve esbâb-ı hırâseti ve bir çift kara sığır öküzleri safka-i vâhide ile mezkûr Mehmed Beşe’ye sekiz bin fıddî râyic fi’l-vakt akçeye bey‘-i bât-ı şer‘î ile bey‘ edip ol dahi vech-i meşrûh üzre iştirâ eyledikden sonra semeni olan meblağ-ı mezbûru yedinden kabz edip mebî‘ât-ı mezbûreyi mahallinde kabza mezkûr Mehmed Beşe’yi taslît eyledik dediklerinde, ba‘de’t-tasdîki’ş-şer‘î mesfûr Mehmed müstakillen müşterî-i mezkûr muvâcehesinde takrîr-i kelâm ve bast-ı merâm eyleyip Gekvize’de medfûn merhûm Mustafa Paşa Vakfı’ndan zikr olunan karye-i Laspahor sınırında lede’l-ahâlî ma‘lûmü’l-hudûd olup tasarrufu babam müteveffâ-yı mesfûrdan bana intikāl eden dokuz kıt‘a tarlanın hakk-ı tasarrufunu ma‘rifet-i mütevelliyle mezkûr Mehmed Beşe’ye tefvîz eyleyip, ol dahi tefevvuz eyledikden sonra mukābele-i tefvîzde yedinden dört bin mezkûru’n-na‘t akçe alıp kabzeyleyip zikr olunan tarlaları mahallinde kabza mezkûr Mehmed Beşe’yi taslît eyledim dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fî evâsıtı Cemâziyelevvel li sene selâsin ve erba‘în ve elf. Şuhûdü’l-hâl: El-Hâc Mustafa b. Süleyman, el-Hâc Mehmed b. ( ), Diğer el-Hâc Mehmed b. ( ), Ali Çelebi b. Mehmed, Ömer Beşe b. Mahmud, Hasan Beşe b. Durmuş, Ahmed Subaşı b. Derviş, Hüseyin Bey b. ( ), İskender Bey b. ( ).