Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 262 Hüküm no: 279 Orijinal metin no: [56b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yasef v. İsak’ın Avraham v. İlya’da alacağı olduğu Mahmiye-i <<İstanbul’da>> Kostantıniyye’de yahud mahallâtından Çelebioğlu mahallesi sükkânından Alman cemâ‘atinden olan işbu hâmilü’l-kitâb Yasef v. İsak nâm Yahudi meclis-i şer‘-i hatîr-i lâzımü’t-tevkīrde, mahmiye-i merkūmede Frenk mahallesi sükkânından olup meyhâneci tâifesinden olan Avraham v. İlya nâm Yahudi muvâcehesinde takrîr-i da‘vâ edip, mezbûr Avraham meyhâneci olmakla mukaddemâ i‘mâl edip, fâ’idesi beynimizde bi tarîki’l-münâsafe tevzî‘ olunmak üzre mâlımdan dört bin yedi yüz guruş teslîm eylediğimde, mezbûr dahi kabz ve i‘mâl edip ba‘dehû re’s-i mâl olan dört bin yedi yüz guruşun üç bin altı yüz guruşu bilâ nakid yedimde zâyi‘ oldu deyip kavlinde musaddak olmak üzre savb-ı şer‘den tahlîf olunmakla yedinde re’s-i mâldan bin yüz guruşum kaldığına Müslimîn huzûrunda i‘tirâf ettikden sonra meblağ-ı merkūmu mezbûr Avraham’dan taleb eyledikde, re’s-i mâl olup sâlifü’z-zikr olan dört bin yedi yüz guruşdan yedimde bir akçe kalmadı cümlesi zâyi‘ oldu deyü mukaddemâ vech-i meşrûh üzre olan i‘tirâfını inkâr etmiş iken tekrâr zikr olunan bin yüz guruş re’s-i mâlı sana def‘ ve teslîm eyledim deyip kelâmında tenâkuz zuhûr etmekle, mezbûr Avraham’ı ihzâr [ve] zikri sebk edip vech-i meşrûh üzre re’s-i mâldan olan bin yüz guruşum alıverilmek taleb ederim dedikde, gıbbe’s-suâl mezbûr Avraham cevâbında, evvelâ zikr olunan dört [bin] yedi yüz guruş re’s-i mâlın cümlesi yedimde zâyi‘ oldu ve sâniyen müdde‘î-i merkūm Yasef’in taleb eylediği bin yüz guruşu bi’t-tamâm kendiye teslîm eyledim deyü da‘vâ-yı def‘ edicek, akībe’l-istintâk merkūm Yasef husûs-ı mezbûru bi’l-külliye inkâr edip mezbûr Avraham’dan da‘vâ-yı def‘ine beyyine taleb olundukda, ityân-ı beyyineden izhâr-ı acz edip [57a] mezbûr Yasef’e yemîn verilmek murâd edicek, merkūm Yasef dahi zikr olunan bin yüz guruşu mekrūm Avraham’ın yedinden alıp kabz ve istîfâ etmediğine gıbbe’l-istihlâf yemîn billâhi’llezî enzele’t-Tevrâte alâ Musa aleyhi’s-selâm edicek, mûcebince merkūm Avraham’a edâya tenbîh olunup, mâ vaka‘a bi’t-taleb ketb olundu. Tahrîren fî gurreti Rebî‘ilâhir li sene selâsin ve erba‘în ve elf. Şuhûdü’l-hâl: Abdurrahman Beşe b. Yusuf er-Râcil, İskender Bey b. Şaban, Yusuf b. Abdullah, Mehmed Bey b. Yusuf er-Râcil, Piyâle Çavuş b. Abdullah.