Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 264 Hüküm no: 283 Orijinal metin no: [57b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâbık yeniçeri kethüdâsı Kara Mehmed Ağa b. Abdülmennân’ın Çerkez asıllı cariyesini âzat ettiği Mahmiye-i Kostantıniyye mahallâtından ( ) mahallesinde sâkin olan sâbık yeniçeri kethüdâsı umdetü’l-emâcid ve’l-a‘yân Kara Mehmed Ağa b. Abdülmennân kıbelinden hasm-ı şer‘î mahzarında âtiyyü’z-zikr âzat ikrârına vekâleti mahmiye-i Kostantıniyye mahallâtından ( ) mahallesi sükkânından Seyyid Ali Efendi b. Seyyid Mehmed ve Mustafa Bey b. Hüsrev nâm kimesnelerin şehâdetleri ile sâbit olan Mevlânâ Hasan Efendi b. Bâli el-Müderris meclis-i şer‘-i şerîfe -sânehu’llâhü te‘âlâ ani’t-tağyîr ve’t-tahrîf- hâzır olup, müvekkil-i mûmâ ileyhi Mahmud Ağa’nın, kendisine rıkkını mu‘terife olan, orta boylu, esmer, iri gözlü, açık kaşlı, Çerkeziyyetü’l-asl hâfıza-i hâzihi’l-vesîka Meleksimâ bt. Abdullah nâm abd-i memlûkini hasbeten lillâhi te‘âlâ ve taleben li-marzâtihi yevme yestezıllu’l-mer’u tahte zılli sadakātihî, âzat ve tahrîr eylediğini bi’l-vekâle ikrâr ve i‘tirâf eyledi. Câriye-i mezbûre bu sûretle sâir harâir-i asliyyât-ı mükellefât gibi hurre oldu. Efendilerin âzatlı köleleri üzerinde şer‘an sâhib oldukları velâ hakkından gayrı üzerinde kimesnenin bir hakkı kalmadı. Cerâ zâlike ve hurrire fî evâsıtı Cumâdelûlâ sene selâse ve erba‘în ve elf. Şuhûdü’l-hâl: Es-Sâbikūn el-mezbûrûn