Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 264 Hüküm no: 282 Orijinal metin no: [57b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâbık yeniçeri kethüdâsı Kara Mehmed Ağa b. Abdülmennân’ın Rus asıllı kölesini âzat ettiği Mahmiye-i Kostantıniyye mahallâtından ( ) mahallesinde sâkin olan sâbık yeniçeri kethüdâsı umdetü’l-emâcid ve’l-a‘yân Kara Mehmed Ağa b. Abdülmennân kıbelinden hasm-ı şer‘î mahzarında âtiyyü’z-zikr âzat ikrârına vekâleti mahmiye-i Kostantıniyye mahallâtından ( ) mahallesi sükkânından Seyyid Ali Efendi b. Seyyid Mehmed ve Mustafa Bey b. Hüsrev nâm kimesnelerin şehâdetleri ile sâbit olan Mevlânâ Hasan Efendi b. Bâli meclis-i şer‘-i şerîfe -sânehu’llâhü te‘âlâ ani’t-tağyîr ve’t-tahrîf- hâzır olup, müvekkil-i mûmâ ileyhi Mahmud Ağa’nın, kendisine rıkkını mu‘terif olan, orta boylu, açık kaşlı, sarışın, gök gözlü, sakallı, yüzünde eser-i cerh bulunan Rûsiyyü’l-asl hâfız-ı hâze’l-kitâb Kenan b. Abdullah nâm abd-i memlûkini hasbeten lillâhi te‘âlâ ve taleben li-marzâtihi yevme yestezıllu’l-mer’u tahte zılli sadakātihî, âzat ve tahrîr eylediğini bi’l-vekâle ikrâr ve i‘tirâf eyledi. Abd-i mezbûr bu sûretle sâir ahrâr-ı asliyyîn-i mükellefîn gibi hür oldu. Efendilerin âzatlı köleleri üzerinde şer‘an sâhib oldukları velâ hakkından gayrı üzerinde kimesnenin bir hakkı kalmadı. Cerâ zâlike ve hurrire fî evâsıtı Cumâdelûlâ sene selâse ve erba‘în ve elf. Şuhûdü’l-hâl: Es-Sâbikūn el-mezbûrûn