Rumeli Sadareti Mahkemesi 56 Numaralı Sicil (H. 1042-1043/M. 1633) cilt: 14, sayfa: 272 Hüküm no: 292 Orijinal metin no: [59b-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Raziye Hatun bt. Ahmed’in Rus asıllı cariyesini tedbîr yoluyla âzat ettiği Udûlden, mahmiye-i Kostantıniyye mahallâtından Cebeci mahallesi imâmı Mevlânâ Ahmed Efendi b. Mehmed ve yine mahalle-i mezbûrede sükkânından Fazlı Çelebi b. Mehmed nâm kimesneler meclis-i şer‘-i şerîfe -sânehu’llâhu te‘âlâ ani’t-tağyîr ve’t-tahrîf- hâzırân olup, âtiyyü’l-beyân müdde‘iyyeye muhallefâtdan diye vâzı‘ûn-i yed olan aşağıdaki kimesneler mahzarında yani, bundan akdem mahalle-i mezbûrede fevt olan Raziye Hâtun bt. Ahmed’in teyzesinin kızı ve vârisi olan Hatice Hâtun bt. Mehmed nâm hâtun mahzarında ve müteveffât-ı mezbûrenin sülüs-i cemî‘-i mâlından yaptığı vasiyetlerinin tenfîzine vasîyy-i muhtâr olan Mahmud Subaşı b. ( ) nâm kimesne mahzarında ve müteveffât-ı merkūmenin zevc-i ve vârisi olan Yusuf Beşe b. ( ) nâm kimesne mahzarında, orta boylu, gök gözlü, açık kaşlı, beyaz tenli, Rûsiyyetü’l-asl hâfıza-i kitâb Şerife bt. Abdullah nâm hâtundan sâdır olan da‘vâ-i sahîha-i şer‘iyyede gıbbe’l-istişhâd şöyle şehâdet ettiler ki, müteveffât-ı mezbûre Raziye Hâtun hâl-i hayâtında ve nefâz-ı tasarrufâtında kendisine rıkkını mu‘terife olan câriye-i memlûke-i mezkûresini bizim yanımızda tedbîr-i mutlak ile tedbîr eyledi. Sonra ecel şerbetini içip rabbine kavuştu. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcibince müdde‘iyye-i mezbûrenin ıtkına hükmedildi. Cerâ zâlike ve hurrire fî evâsıtı Cumâdelûlâ sene selâse ve erba‘în ve elf. Şuhûdü’l-hâl: Es-Sâbikūn el-mezbûrûn